وفاقی حکومت نے توشہ خانہ کیس میں لاہور ہائی کورٹ احکامات کیخلاف دائر اپیل واپس لے لی ہے۔

تفصیلات کے مطابق سپریم کورٹ کے جج جسٹس اعجاز الاحسن کی سربراہی میں دو رکنی بنچ نے توشہ خانہ تحائف کی نیلامی سے متعلق کیس کی سماعت کی۔

سماعت کے آغاز پر ڈپٹی اٹارنی جنرل ملک جاوید نے عدالت کو بتایا کہ توشہ خانہ تحائف کے حوالے سے نیا قانون توثیق کیلئے صدر پاکستان کے پاس ہے۔

جسٹس اعجاز الاحسن نے ریمارکس دیے کہ قانون بے شک نیا بن جائے ہائیکورٹ کا فیصلہ اپنی جگہ برقرار رہے گا، ہائیکورٹ نے قرار دیا کہ توشہ خانہ تحائف عوامی ملکیت ہیں، عوامی ملکیت کے حامل تحائف کی نیلامی میں ہر شخص حصہ لے سکتا ہے، تحائف عوامی ملکیت ہیں تو ایسا ممکن نہیں کہ صرف مخصوص افراد ہی خرید سکیں۔

دوارن سماعت جسٹس اطہر من اللہ نے کہا کہ لاہور ہائیکورٹ کا فیصلہ آئین اور قانون کے مطابق درست ہے، سب سے زیادہ بولی دینے والا ہی تحفہ خریدنے کا حقدار ہوسکتا ہے۔

وفاقی حکومت نے لاہور ہائیکورٹ کے فیصلے کیخلاف اپیل کی پیروی کرنے یا نہ کرنے پر وقت مانگ لیا۔

ڈپٹی اٹارنی جنرل ملک جاوید نے حکومت سے ہدایات لینے کی استدعا کی جس کے بعد کیس کی سماعت میں کچھ دیر کا وقفہ کر دیا گیا۔

سپریم کورٹ میں توشہ خانہ کیس کی وقفے کے بعد دوبارہ سماعت ہوئی اور وفاقی حکومت نے توشہ خانہ کیس میں ہائی کورٹ احکامات کیخلاف دائر اپیل واپس لے لی۔

سماعت کے دوران ڈپٹی اٹارنی جنرل نے کہا کہ توشہ خانہ نئے رولز کی روشنی میں اپیل واپس لینا چاہتے ہیں۔

جسٹس اطہر من اللہ نے ریمارکس دیے کہ رولز پر نہ جائیں توشہ خانہ پر پہلے ہی بہت شرمندگی ہوچکی ہے، رولز کی بات کرینگے تو سوال اٹھائیں گے کہ کس قانون کے تحت قواعد بنائے ہیں، قواعد کی بات رہنے دیں اپیل واپس لے رہے ہیں تو ایسے ہی لیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں