اسلام آباد ہائیکورٹ نے بشریٰ بی بی کی آڈیو لیکس کیخلاف درخواست پر سماعت 18 ستمبر تک ملتوی کر دی۔

تفصیلات کے مطابق اسلام آباد ہائیکورٹ کے جسٹس بابر ستار نے بشریٰ بی بی کی آڈیو ٹیپنگ اور اداروں کی جانب سے ہراساں کرنے کے خلاف درخواست پر سماعت کی۔

 عدالت نے کیس فون ٹیپنگ کے خلاف پہلے سے زیر سماعت نجم الثاقب کی درخواست کے ساتھ یکجا کر دیا اور کہا کہ آپکی درخواست پر نوٹس کر رہے ہیں اسی نوعیت کے دوسرے کیس کے ساتھ سنیں گے۔

جسٹس بابر ستار نے استفسار کیا کہ کھوسہ صاحب آپ نے کیا درخواست دائر کی ہے؟ جس پر انہوں نے کہا کہ بدقسمتی سے ہمارے فون مسلسل بَگ کیے جا رہے ہیں۔

جسٹس بابر ستار نے ریمارکس دیے کہ وہ تو سب کے ہی ہو رہے ہیں اس میں کونسی بڑی بات ہے، آپکی درخواست پر اعتراض ہے کہ آپ نے کوئی آرڈر چیلنج ہی نہیں کیا۔

لطیف کھوسہ نے اپنے دلائل میں کہا کہ پولیس اور ایف آئی اے بشریٰ بی بی کو مسلسل ہراساں کر رہے ہیں۔

جسٹس بابر ستار نے لطیف کھوسہ سے مکالمہ کیا کہ آپ کو دو پہلوؤں پر عدالت کی معاونت کرنی ہو گی، فون ٹیپنگ کی قانونی حیثیت پر عدالت کی معاونت کریں، قانون نافذ کرنے والے اداروں سے معلومات کا ذریعہ نہیں پوچھا جا سکتا، قانونِ شہادت سے اِس پہلو پر بھی آئندہ سماعت پر عدالتی معاونت کریں۔

 وکیل لطیف کھوسہ نے کہا کہ ایف آئی اے کو آئندہ سماعت تک ہراساں کرنے سے روک دیا جائے، جس پر جسٹس بابر ستار نے کہا کہ میں ایسا آرڈر پاس کروں گا جس پر عملدرآمد کروا سکوں، ہراسگی ایک وسیع ٹرم ہے کہ کل آپ توہین عدالت کی درخواست لے کر آ جائیں گے۔

اسلام آباد ہائیکورٹ نے کیس کی سماعت 18 ستمبر تک ملتوی کر دی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں