اسلام آباد: پاکستان تحریک انصاف (پی ٹی آئی) کے رہنما عمر اسلم کو الیکشن لڑنے کی اجازت مل گئی ہے۔

جسٹس منصور علی شاہ کی سربراہی میں قائم بینچ نے پی ٹی آئی رہنما عمر اسلم کے کاغذات نامزدگی مسترد ہونے کے معاملے پر سماعت کی۔

سپریم کورٹ نے پی ٹی آئی کے رہنما عمر اسلم کو انتخابات لڑنے کی اجازت دیتے ہوئے کہا کہ مفرور ہونے کی بنیاد پر کسی جو انتخابات لڑنے سے نہیں روکا جا سکتا۔

جسٹس منصور علی شاہ نے کہا کہ بغیر قانون کسی کو بنیادی حق سے کیسے محروم کیا جا سکتا ہے، مفرور شخص الیکشن نہیں لڑ سکتا بتا دیں کہاں لکھا ہے۔

دوران سماعت جسٹس اطہر من اللہ نے ریمارکس دیتے ہوئے کہا کہ الیکشن لڑنا بنیادی حق ہے، الیکشن کون لڑے گا کون نہیں فیصلہ عوام نے کرنا ہے الیکشن کمیشن نے نہیں، ملک کی عوام کو فیصلہ کرنے دیں۔

انہوں نے کہا کہ ہمارے سامنے آنے والے درخواست گزار کی اہمیت نہیں، عوام کے حقوق متاثر ہو رہے ہیں، احتساب عوام نے کرنا ہے الیکشن کمیشن نے نہیں۔

وکیل مخالف فریق نے کہا کہ عمر اسلم سکروٹنی کے وقت بھی موجود نہیں تھے۔

وکیل الیکشن کمیشن نے کہا کہ بیلٹ پیپرز کا کام مکمل ہو چکا ہے، جس پر جسٹس اطہر من اللہ نے کہا کہ عدالتی فیصلے پر عمل کرنا الیکشن کمیشن کی ذمہ داری ہے۔

بعدازاں سپریم کورٹ نے پی ٹی آئی کے رہنما عمر اسلم کو انتخابات لڑنے کی اجازت دے دی۔

یاد رہے کہ پی ٹی آئی کے رہنما عمر اسلم کے نو مئی کے مقدمات میں مفرور ہونے کی بنیاد پر کاغذات نامزدگی مسترد کیے گئے تھے۔