اسلام آباد کی انسداد دہشتگردی عدالت نے وزیر اعلیٰ خیبر پختونخوا علی امین گنڈا پور اور پی ٹی آئی رہنما عامر مغل کی حاضری سے استثنیٰ کی درخواست مسترد کرتے ہوئے دونوں کے ناقابل ضمانت وارنٹ گرفتاری جاری کردیے۔

انسداد دہشت گردی عدالت کے جج طاہر عباس سپرا نے بانی پی ٹی آئی اور دیگر کے خلاف تھانہ سنگجانی اور  آئی 9 میں درج مقدمات سے متعلق کیس کی سماعت کی۔

پی ٹی آئی رہنما علی نواز اعوان، واثق قیوم، عامر کیانی و دیگر عدالت میں پیش ہوئے۔

وزیر اعلیٰ کے پی کے علی امین گنڈاپور اور عامر مغل کیجانب سے حاضری سے استثنیٰ کی درخواست کی گئی۔

 عدالت نے علی امین گنڈاپور اور عامر مغل کی حاضری سے استثنیٰ کی درخواست مسترد کرتے ہوئے ان دونوں سمیت غیر حاضر ملزمان کو ناقابل ضمانت وارنٹ گرفتاری جاری کردیے۔

عدالت نے استفسار کیا کہ حاضری پوری نا ہونا ملزمان پر ہے یا کورٹ پر ہے، جس پر وکلاء نے جواب دیا کہ ملزمان پر ہے۔

جج طاہر عباس سپرا نے برہمی کا اظہار کرتے ہوئے کہا کہ  تمام غیر حاضر ملزمان کے وارنٹ گرفتاری ہوں گے، تماشہ بنا ہوا ہے ایک آتا ہے دو نہیں ہوتے آتے، جس پر وکلاء صفائی نے کہا کہ اگلی پیشی پر تمام ملزمان کی حاضری یقینی ہو گی۔

عدالت نے ریمارکس دیے کہ تمام غیر حاضر ملزمان کے بلاضمانتی وارنٹ گرفتاری جاری کررہے ہیں، آئندہ پیشی پر حاضری کے والے سے مکمل یقین دہانی کروائی جائے گی تو پھر وارنٹ کا معاملہ دیکھیں گے، وکلاء صفائی نے کہا کہ ایک موقع دیا جائے اگلی پیشی پر تمام ملزمان ہوں گے۔

عدالت بانی پی ٹی آئی کی ویڈیو لنک پیشی کے حوالے سے سپریڈنٹ اڈیالہ جیل سے تحریری جواب طلب کرلیا اور کہا کہ جو ملزم 8 تاریخ کو نہیں آئیں گے انکو اشتہاری قرار دوں گا، 8 جولائی کو کوئی بیمار ہو بخار ہے کچھ بھی جو نہ آیا اسے اشتہاری قرار دیں گے۔

جج طاہر عباس سپرا نے ریمارکس دیے کہ عدالتی مفرور کو اشتہاری قرار دینے کیلئے تیس دن ضروری نہیں ہیں، میں نے ان کیسز کو انجام تک پہچانا ہے آپکا ہی اس میں فائدہ ہوگا، اگر کیسز میں جان ہوئی تو چلیں گے ورنہ فارغ ہوں گے، 8 جولائی کے بعد کیسز کی سماعت روزانہ کی بنیاد پر ہوگی۔

بعدازاں انسداد دہشتگردی عدالت نے دونوں مقدمات کی سماعت 8 جولائی تک ملتوی کردی۔