اسلام آباد ہائی کورٹ نے 190 ملین پاؤنڈ کیس میں ٹرائل کورٹ کو حتمی فیصلہ سنانے سے روک دیا۔

‏ اسلام آباد ہائیکورٹ کے جسٹس میاں گل حسن اورنگزیب اور جسٹس بابر ستار نے بانی پی ٹی آئی کی نیب ایگزیکٹو بورڈ میٹنگ میں 190 ملین پاؤنڈز کیس بند کرنے کی منظوری کا ریکارڈ فراہمی اور کیس کا ٹرائل روکنے کی درخواست پر سماعت کی۔

سماعت کے آغاز پر بانی پی ٹی آئی کے وکیل سلمان صفدر نے دلائل دیتے ہوئے کہا کہ بانی پی ٹی آئی اور بشریٰ بی بی کے خلاف القادر ٹرسٹ کیس زیرسماعت ہے، بانی پی ٹی آئی کو القادر ٹرسٹ کیس میں ہی اسلام آباد ہائیکورٹ سے گرفتار کیا گیا تھا، نیب نے ابتدائی طور پر 8 ملزمان کے خلاف ریفرنس دائر کیا، عدالت نے دیگر چھ کو عدم پیشی پر اشتہاری قرار دے دیا۔

وکیل نے دلائل دیے کہ بانی پی ٹی آئی اور بشریٰ بی بی کے خلاف ریفرنس زیر سماعت ہے، نیب کے مطابق این سی اے نے 190 ملین پاؤنڈزز کی رقم ضبط کی۔

جسٹس میاں گل حسن اورنگزیب نے استفسار کیا کہ کیا این سی اے کے طرف سے رقم براہ راست پاکستان بھیجی گئی؟ جس پر وکیل سلمان صفدر نے جواب دیا کہ نہیں، این سی اے نے وہ رقم ڈی فریز کر دی اور ملک ریاض اور انکی فیملی کو دیدی پھر انہوں نے خود وہ رقم سپریم کورٹ کے رجسٹرار کے اکاؤنٹ میں بھیجی۔

‏ وکیل سلمان صفدر نے عدالت کو بتایا کہ ملک ریاض نے القادر ٹرسٹ کیلئے زمین تحفے میں دی، اس پر جسٹس میاں گل حسن اورنگزیب نے سوال کیا کہ یہ یونیورسٹی کہاں ہے؟ وکیل نے جواب دیتے ہوئے کہا کہ یونیورسٹی جہلم کے قریب ہے اور فنکشنل ہے۔

جسٹس میاں گل حسن اورنگزیب نے استفسار کیا کہ یونیورسٹی فنکشنل ہے؟ وکیل سلمان صفدر نے جواب دیا کہ جی بالکل۔

جسٹس حسن اورنگزیب نے وکیل سے پوچھا کہ برطانیہ کی طرف سے رقم ملک ریاض اور فیملی کو واپس کر دی گئی؟ رقم پاکستان کس کی جانب سے پاکستان بھیجی گئی؟ وکیل سلمان صفدر نے بتایا کہ رقم واپس کر دی گئی اور ملک ریاض فیملی کی طرف سے بھیجی گئی۔

بانی پی ٹی آئی کے وکیل نے کہا کہ ریفرنس میں ہے کہ القادر ٹرسٹ کیس فعال ہے یہ گھوسٹ پراجیکٹ نہیں ہے، 458 کنال زمین پہلے ملک ریاض کی ملکیت تھی اب یونیورسٹی ٹرسٹ کے نام ہے۔

عدالت نے استفسار کیا کہ کیا ٹرسٹ رجسٹرڈ ہے؟ وکیل نے جواب دیا کہ جی رجسٹرڈ ٹرسٹ ہے، عدالت نے کہا کہ میرے پاس کیس ہے یہ رجسٹرڈ تو نہیں، جس پر سلمان صفدر نے کہا کہ میں اس حوالے سے معلوم کرکے آئندہ سماعت پر عدالت کو بتاؤں گا۔

بعدازاں عدالت نے 190 ملین پاؤنڈ کیس میں ٹرائل کورٹ کو حتمی فیصلہ سنانے سے روک دیا اور نیب کو نوٹس جاری کرتے ہوئے بدھ تک جواب طلب کرلیا۔

اسلام آباد ہائیکورٹ کے جسٹس حسن اورنگزیب نے وکیل سلمان صفدر سے کہا کہ بانی پی ٹی آئی کے وکلاء نے اگر تاخیری حربے استعمال کیے تو ٹرائل کورٹ کو فیصلہ دینے سے روکنے کا حکم واپس لے کر جلد از جلد فیصلہ دینے کا آرڈر کریں گے۔