اسلام آباد: سپریم کورٹ میں فوجی عدالتوں میں سویلینز کے ٹرائل کیخلاف انٹراکورٹ اپیل پر سماعت کے دوران جسٹس جمال مندوخیل نے ریمارکس میں کہا کہ سویلینز کا ٹرائل کہیں بھی ہو کیا فرق پڑتا ہے۔

جسٹس امین الدین خان کی سربراہی میں سات رکنی لارجر بینچ نے فوجی عدالتوں میں سویلینز کے ٹرائل کے خلاف انٹرا کورٹ اپیل پر سماعت کی۔

سماعت کے آغاز پر جسٹس محمد علی مظہر نے سوال کیا کہ ملٹری کورٹس سے کتنے لوگ رہا ہوئے، سول سوسائٹی کے وکیل فیصل صدیقی نے بتایا کہ 105 کل ملزمان تھے جس میں سے 20 ملزمان رہا ہوئے۔

ایڈیشنل اٹارنی جنرل نے عدالت کو بتایا کہ 20 پہلے ہوئے تھے پھر 19 رہا ہوئے اس وقت جیلوں میں 66 ملزمان ہیں۔

وکیل فیصل صدیقی نے دلائل دیے کہ امریکہ میں رواج ہے کہ دلائل کے اختتام پر دونوں پارٹیز کو مجوزہ فیصلے کا حق دیا جاتا ہے، اگر یہ کہتے ہیں کہ کورٹ مارشل کرنا ہے تو اس کا بھی متبادل ہے۔

جسٹس جمال خان مندوخیل نے کہا کہ جرم کسی نے بھی کیا ہو سزا تو ہونی چاہیے، ٹرائل یہاں ہو یا وہاں ہو کیا فرق پڑتا ہے، جس پر وکیل سول سوسائٹی کا کہنا تھا کہ ٹرائل میں زمین آسمان کا فرق ہے ایک ٹرائل آزاد ہے دوسرا ملٹری میں ہے، اس دوران جسٹس جمال مندوخیل نے کہا کہ سارے فورم موجود ہیں سارے فورم قابل احترام ہیں۔

سول سوسائٹی کے وکیل فیصل صدیقی نے سویلین کے ملٹری ٹرائل سے متعلق کیس میں دلائل مکمل کرتے ہوئے کہا کہ جہاں دفاع پاکستان کو خطرہ ہو وہاں سویلین کا ملٹری کورٹس میں ٹرائل ہو سکتا ہے، نو مئی واقعات میں کیسز توڑ پھوڑ کے ہیں۔

بعدازاں آئینی بینچ نے فوجی عدالتوں میں سویلینز کے ٹرائل کیخلاف انٹراکورٹ اپیل پر مزید سماعت کل تک ملتوی کردی، تاہم درخواست گزار بشری قمر کے وکیل عابد زبیری اپنے دلائل جاری رکھیں گے۔