کراچی: مصطفیٰ عامر قتل کیس کا مرکزی ملزم ارمغان حوالہ ہنڈی میں بھی ملوث نکلا جس کے بعد ملزم کے خلاف اینٹی منی لانڈرنگ سرکل میں سرکار کی مدعیت میں مقدمہ درج کر لیا گیا۔

وفاقی تحقیقاتی ایجنسی (ایف آئی اے) کے مطابق ملزم ارمغان حوالہ ہنڈی، ڈیجیٹل کرنسی سمیت مختلف چیزوں میں ملوث نکلا۔

مقدمے کے متن کے مطابق ملزم جعلسازی سے ہر ماہ 3 سے 4 لاکھ ڈالر کماتا تھا، ملزم پیسے ڈیجیٹل کرنسی میں تبدیل کرتا تھا، ملزم کی پاس جو گاڑیاں ہیں وہ بھی ڈیجیٹل کرنسی کی رقم سے خریدی گئیں۔

ایف آئی آر میں بتایا گیا کہ ملزم نے اپنے 2 ملازمین کے نام پر بینک اکاؤنٹس کھلوائے تھے، ملزم کے کال سینٹر سے امریکہ کالز کی جاتی تھیں، کالز کے ذریعے امریکی شہریوں سے اہم معلومات حاصل کی جاتی تھیں اور ان سے فراڈ کے ذریعے رقم بٹوری جاتی تھی، فراڈ کے ذریعے نکالی جانے والی رقم ملزم ارمغان تک پہنچتی تھی۔

مقدمے کے متن کے مطابق ملزم ارمغان نے 2018 میں اپنا غیر قانونی کال سینٹر قائم کیا، ملزم اپنے کال سینٹر سے فراڈ کا منظم نیٹ ورک چلا رہا تھا، کال سینٹر کا ہر فرد یومیہ 5 افراد سے جعلسازی کرتا تھا۔

ایف آئی آر میں کہا گیا کہ ملزم کے پاس کروڑوں روپے مالیت کی 3گاڑیاں ہیں، ملزم 5 گاڑیاں فروخت کر چکا ہے جبکہ ارمغان نے والد کے ساتھ مل کر حوالہ ہنڈی کے لیے امریکہ میں کمپنی بھی بنائیں۔