اسلام آباد: وزارت قانون و انصاف نے اسلام آباد ہائیکورٹ کے ججز کی سینیارٹی لسٹ جاری کر دی ہے، جس کے مطابق جسٹس سرفراز ڈوگر عدالت کے سینیئر ترین جج قرار دے دیے گئے ہیں۔

اسلام آباد ہائیکورٹ کے ججز کی سینیارٹی کا نوٹیفکیشن صدر مملکت آصف علی زرداری کی منظوری کے بعد جاری کیا گیا ہے۔

جاری کردہ فہرست کے مطابق جسٹس محسن اختر کیانی سینیارٹی میں دوسرے جبکہ جسٹس میاں گل حسن اورنگزیب تیسرے نمبر پر ہیں۔

اس کے علاوہ جسٹس طارق محمود جہانگیری چوتھے، جسٹس بابر ستار پانچویں اور جسٹس اعجاز اسحاق چھٹے نمبر پر براجمان ہیں۔

سینیارٹی لسٹ میں بتایا گیا ہے کہ جسٹس ارباب طاہر کا فہرست میں ساتواں، جسٹس ثمن رفعت کا آٹھویں، جسٹس خادم سومرو کا نویں اور جسٹس اعظم خان دسویں نمبر ہے۔

وزارت قانون کے مطابق جسٹس محمد آصف سنیارٹی میں گیارہویں اور جسٹس انعام امین منہاس بارہویں نمبر پر ہوں گے۔

نوٹیفکیشن میں کہا گیا ہے کہ جسٹس سرفراز ڈوگر کا اسلام آباد ہائی کورٹ میں تبادلہ عارضی نہیں بلکہ مستقل بنیادوں پر کیا گیا ہے، اسی طرح جسٹس خادم حسین سومرو اور جسٹس محمد آصف کے تبادلے بھی مستقل ہیں۔

واضح رہے کہ سپریم کورٹ کی ہدایت پر صدر مملکت کو اسلام آباد ہائیکورٹ کے ججز کی سینیارٹی کے تعین کا اختیار دیا گیا تھا، جس کی روشنی میں یہ فہرست جاری کی گئی۔