اسلام آباد: پاکستان ٹیلی کمیونیکیشن کے شعبے میں خصوصی سرمایہ کاری سہولت کونسل کی مدد سے اہم پیشرفت سامنے آئی ہے۔

تفصیلات کے مطابق ٹیلی کمیونیکیشن کے شعبے میں اہم پیشرفت کے پیش نظر خصوصی سرمایہ کاری سہولت کونسل کا فورم ملک و قوم کے مفاد میں اہم فیصلوں میں معاون ثابت ہو رہا ہے، عسکری و سیاسی قیادت سمیت تمام اسٹیک ہولڈرز کی موجودگی کے باعث فیصلہ سازی میں آسانی بھی ہو رہی ہے۔

اس حوالے سے نگران وفاقی وزیر آئی ٹی و ٹیلی کمیونیکیشن ڈاکٹر عمر سیف نے کہا ہے کہ ملک میں ڈیجیٹل ٹرانسفارمیشن اور براہ راست غیرملکی سرمایہ کاری کی راہیں ہموار کرنے کیلئے خصوصی سرمایہ کاری سہولت کونسل کے فورم سے ملک و قوم کے مفاد میں اہم فیصلوں کا براہ راست فائدہ عام آدمی کو ہوگا اور ملک کی معیشت مستحکم ہوگی۔

انہوں نے کہا کہ یہ فورم عسکری و سیاسی قیادت کے ساتھ تمام اسٹیک ہولڈرز کی موجودگی کے باعث فیصلہ سازی میں معاون ثابت ہوتا ہے، ایس آئی ایس سی کی موجودگی سے آنے والی حکومت بھی ملک کی تعمیر و ترقی اور عوامی مفادات کے فیصلے بروقت کر سکے گی۔

وفاقی وزیر آئی ٹی نے کہا کہ سال 2014 سے سینکڑوں میگاہرٹز اسپیکٹرم کا کیس محکمانہ تاخیر کی وجہ سے عدالت میں زیرِ بحث رہا، اس معاملے کو ایس آئی ایف سی کے فورم پر اٹھایا گیا جس کے بعد سندھ کی عدالت عالیہ نے روزانہ کی بنیادوں پر کیس کی سماعت کی اور 14 دسمبر کو فیصلہ سنایا۔

انکا کہنا تھا کہ ایک ارب مالیت کا یہ سپیکٹرم نگران حکومت کی طرف سے عوام کیلئے بہت بڑی خوشخبری ہے، اسپیکٹرم نیلامی اور آپٹیکل فائبر کیبل کا جال بچھانے کیلئے (ایس آئی ایف سی) کے تحت (Right of Way) پالیسی کا نفاذ رائٹ آف عمل میں لایا گیا۔

عمر سیف نے مزید کہا کہ ملک کی پہلی خلائی پالیسی کی تیاری اور اس کی متعلقہ فورمز سے منظوری میں ایس آئی ایف سی کا مرکزی کردار رہا ہے، عوام کو بہت جلد سیٹیلائٹ انٹرنیٹ بھی دستیاب ہوگا جبکہ موجودہ نیٹ ورک میں بھی کافی بہتری آئے گی۔