اسلام آباد: پاک بحریہ کا جنگی جہاز یمامہ سمندر میں اتار دیا گیا ہے۔

ذرائع کے مطابق پاکستان نیوی کے لئے چوتھا یرموک کلاس آف شور پیٹرول ویسل یمامہ لانچ کر دیا گیا، ڈامن شپ یارڈ کی جانب سے پاک بحریہ کے لئے او پی وی رومانیہ کے گالاٹی شپ یارڈ میں تیار کیا گیا ہے۔

ذرائع نے بتایا ہے کہ یرموک کلاس کے پہلے 2 جہازوں کے مقابلے میں آخری دو او پی ویز 2600 ڈسپلیسمنٹ کے حامل ہیں، یرموک کلاس جہازوں کو ان کی بے مثال خوبیوں کی بدولت پاکستان نیوی میں گائیڈڈ میزائل کورویٹس کا درجہ حاصل ہو گا۔

ذرائع کا کہنا ہے کہ پی این ایس یمامہ سمیت یرموک کلاس کے تمام جہاز سطح اور فضا میں جنگ کے ساتھ سرچ اینڈ ریسکیو آپریشن کے لئے بھی موزوں ہیں جبکہ 98 میٹر طویل پی این ایس یمامہ کی رفتار 22 سے 25 ناٹس کے لگ بھگ ہے۔

علاوہ ازیں ورٹیکل لانچنگ سسٹم کی مدد سے پی این ایس یمامہ سطح سے فضا میں ہدف کو نشانہ بنانے والے میزائل داغ سکتا ہے جبکہ 76 ایم ایم مین گن کے ساتھ پی این ایس یمامہ پر فضائی اہداف کو بھی نشانہ بنا سکتا ہے۔

ذرائع نے مزید بتایا کہ پاک بحریہ کے یرموک کلاس جہاز اسلامی تاریخ کی اہم جنگوں سے منسوب ہیں، 2020 میں پہلے یرموک کلاس جہاز کے بعد پی این ایس تبوک پاک بحریہ میں شامل ہوا، تاہم یرموک کلاس کے آخری دو جہاز، پی این ایس حنین اور پی این ایس یمامہ ہیں۔