کور کمانڈر پشاور لیفٹیننٹ جنرل حسن اظہر حیات نے کہا ہے کہ سوشل میڈیا کی خبروں کی تحقیق بہت ضروری ہے۔

پشاور میں پاک فوج کی جانب سے شمالی وزیرستان سے تعلق رکھنے والے طلبہ کے لئے یوتھ کنونشن کا انعقاد کیا گیا جس میں میں بڑی تعداد میں طلبہ اور طالبات نے شرکت کی۔

اس موقع پر کور کمانڈر پشاور لیفٹیننٹ جنرل حسن اظہر حیات نے شرکاء سے مہمان خصوصی کی حیثیت سے خطاب کیا۔

لیفٹیننٹ جنرل حسن اظہر حیات نے اپنے خطاب میں کہا کہ نوجوانوں کو اپنے وطن،  قوم،  ثقافت و تہذیب و تمدن اور اپنے آپ پر بے پناہ اعتماد ہونا چاہیے۔

کور کمانڈر پشاور کا کہنا تھا کہ سوشل میڈیا اور پروپیگنڈا کا مقصد بے یقینی، افرا تفری اور مایوسی پھیلانا ہے، سوشل میڈیا کی خبروں کی تحقیق بہت ضروری ہے۔

انہوں نے مزید کہا کہ یوتھ کنونشن میں نوجوان نسل کو علاقائی صورتحال، درپیش مشکلات، دیرپا قیام امن اور زیر عمل ترقیاتی منصوبوں سے روشناس کروایا گیا۔

کور کمانڈر لیفٹیننٹ جنرل حسن اظہر حیات کی جانب سے مستقبل میں بھی نوجوانوں کے لیے ایسے پروگرام منعقد کروانے کی خواہش کا اظہار کیا گیا۔

دوسری جانب شمالی وزیرستان کے نوجوانوں اور خواتین نے پاک فوج کا بھرپور شکریہ ادا کیا اور کہا کہ قبائلی نوجوان پاک فوج کے شکر گزار ہیں، پاک فوج کا شمالی وزیرستان میں عوام کی فلاح اور قیام امن کیلئے کی جانے والی کوششیں خوش آئند ہیں۔

شمالی وزیرستان کے طلبہ کا مزید کہنا تھا کہ تعلیم اور امن کیلئے پاک فوج کی کاوشوں کا شکریہ ادا کرتے ہیں، نوجوان اپنی افواج کے ساتھ سیسہ پلائی دیوار کی طرح  کھڑی ہے۔