اسلام آباد: بلوچستان میں دہشت گردانہ حملوں میں بھارتی میڈیا کا انتہائی شرمناک کردار سامنے آگیا ہے۔

پاکستان کا ازلی دشمن بھارت پاکستان کو کمزور کرنے اور پاکستان کی ترقی کی راہ میں رکاوٹ ڈالنے کیلئے ہمیشہ پیش پیش رہا ہے، بلوچستان میں نام نہاد آزاد بلوچستان کا لبادہ اوڑھے دہشت گرد بھارتی خفیہ ایجنسی را کی مدد سے پاکستان میں معصوم لوگوں کا خون بہا رہے ہیں۔

ذرائع نے بتایا ہے کہ بلوچستان میں تازہ ترین حملوں کے پیچھے بھی بھارتی خفیہ ہاتھ کو نظر انداز نہیں کیا جا سکتا، بلوچستان میں دہشت گردانہ حملوں کے دوران بھارتی میڈیا خوشیاں مناتا رہا اور اپنی طرف سے من گھڑت کہانیاں چلاتا رہا۔

ذرائع کے مطابق 25 سے 26 اگست کی رات کیے گئے حملوں کے حوالے سے بھارتی میڈیا، سوشل میڈیا اکاؤنٹس پر خوشیاں مناتی رہی، بھارتی میڈیا نے دہشت گرد حملوں کو غیر معمولی کوریج دی۔

دفاعی ماہرین کا کہنا ہے کہ انڈین میڈیا کی جانب سے تفصیلی اور پروپیگنڈا خبروں کا جاری ہونا واضح کرتا ہے کہ ان دہشت گرد حملوں کے پیچھے بھی بھارت خفیہ ایجنسی را کی مکمل حمایت اور مدد شامل ہے۔

بھارتی میڈیا نے اپنے ہی انٹیلیجینس سورسز کو کوٹ کرتے ہوئے کہا کہ بلوچ حملوں میں اس قسم کی توانائی اور ہم آہنگی پہلی بار دیکھی گئی ہے، بلوچستان میں مہرنگ بلوچ کی سربراہی میں مسنگ پرسنز کی کمپین پیک پر پہنچ چکی ہے۔

دفاعی ماہرین نے بتایا کہ بھارتی خفیہ ایجنسی ماہ رنگ کو ہتھیار بنا کر معصوم شہریوں پر حملے کروا رہی ہے۔

اس کے علاوہ بھارت کی جانب سے ٹوئٹر ایکس اکاؤنٹ پر بھی نیا پروپیگنڈا منظر عام پر آچکا ہے، بھارتی سوشل میڈیا پر یہ پروپیگنڈا کیا گیا کہ دہشتگرد تنظیم بی ایل اے نے پاکستانی سیکیورٹی فورسز کے 102 اہلکار ہلاک کر دیے۔

دفاعی ماہرین کا کہنا ہے کہ ماہ رنگ بلوچ اور بلوچ دہشت گرد تنظیمیں ایک ہی سکے کے دو رخ ہیں، ایک طرف معصومیت کا ڈرامہ رچایا جاتا ہے جبکہ دوسری جانب دہشت گرد حملوں سے پاکستان میں بدامنی پھیلائی جا رہی ہے، لاپتہ افراد کا بہانہ اور نام نہادآزادی کا ڈرامہ ملک میں انتشار اور بدامنی پھیلانے کی منظم سازش ہے جو ناکام ہو چکی ہے۔