راولپنڈی: پاکستان بحریہ کے نئے جہاز پی این ایس حنین نے عمان کا دورہ کیا ہے۔

پاک فوج کے شعبہ تعلقات عامہ (آئی ایس پی آر) کے مطابق پاکستانی بحریہ کے جہاز حنین نے رومانیہ سے پاکستان کے لیے پہلے سفر کے دوران عمان کی بندرگاہ سلالہ کا دورہ کیا اور رائل نیوی آف عمان کے جہاز کے ساتھ بحری مشق میں حصہ لیا۔

مشق کا مقصد دونوں بحری افواج کے درمیان باہمی تعاون اور مشترکہ آپریشنز کی صلاحیت کو فروغ دینا تھا۔

دورہ عمان کے دوران جہاز کے کمانڈنگ آفیسر نے عمان کے عسکری حکام سے ملاقاتوں کے دوران باہمی دلچسپی کے امور پر تبادلہ خیال کیا۔

دونوں ممالک کے اعلیٰ حکام کی ملاقاتیں، جنگی بحری جہازوں کے دورے، مشترکہ مشقیں اور باہمی میری ٹائم پیٹرولنگ، باقاعدگی کے ساتھ منعقد کیے جاتے ہیں۔

واضح رہے کہ پی این ایس حنین DAMEN نیول شپ یارڈ رومانیہ میں تعمیر کیے جانے والے پاک بحریہ کے چار یرموک کلاس جہازوں میں سے تیسرا جہاز ہے۔

مزید برآں پی این ایس حنین کے حالیہ دورے سے دونوں بحری افواج کے درمیان دوطرفہ تعلقات مزید مستحکم ہوں گے، پی ایس حنین کی پاکستان بحریہ میں باقاعدہ شمولیت کی پرتپاک تقریب 6 ستمبر کو نیول ڈاکیارڈ میں منعقد ہو گی جبکہ صدر پاکستان  آصف علی زرداری تقریب کے مہمان خصوصی ہونگے۔