اسلام آباد: خارجی دہشتگردوں کی پے درپے ہلاکتیں کے بعد قیادت موبائل فون کے استعمال سے خائف ہے۔

ذرائع کے مطابق فتنتہ الخوارج کے سرغنہ نور ولی محسود کی خفیہ گفتگو منظر عام پر آگئی، کالعدم فتنہ الخوراج کے سرغنہ خارجی نور ولی کی جانب سے تمام دہشتگردوں کے موبائل فون استعمال پر پابندی عائد کردی گئی ہے۔

ذرائع نے بتایا ہے کہ خفیہ گفتگو میں خارجی نور ولی محسود دہشتگردوں کو موبائل استعمال پر پابندی کی ہدایات دے رہا ہے۔

خارجی نور ولی محسود کا کہنا ہے کہ سارے مجاہدین کو یہ پیغام پہنچا دو کہ موبائل سادہ ہو یا انٹرنیٹ والا ہو، مستقبل میں کسی کو بھی استعمال کرنے کی اجازت نہیں ہے، جب ضرورت ہو تو موبائل استعمال کریں اور پھر فورا بند کر دیں۔

کالعدم فتنہ الخوراج کے سرغنہ کا کہنا تھا کہ ہماری چھان بین ہو رہی ہے اور ہم پر نظر رکھی جا رہی ہے، سب مجاہدین کو کہہ دو بلا ضرورت موبائل کے استعمال کی اجازت کسی کو نہیں ہے، صرف ضرورت کے تحت موبائل استعمال کرنا ہے اور پھر فوراً بند کر کے اس سے دور ہو جانا ہے۔

دفاعی ماہرین کے مطابق یہ پابندی اس وقت عائد کی گئی ہے جب فتنہ الخوارج کے دہشتگردوں کی ہلاکتوں میں مسلسل اضافہ ہو رہا ہے، دہشتگردوں کی ہلاکتوں کی وجہ سے فتنہ الخوارج کی قیادت سیکیورٹی تدابیر میں سختی لانے پر مجبور ہوئی ہے۔

ماہرین کا کہنا ہے کہ اس سے قبل بھی دہشتگردوں کی نقل و حرکت محدود کرنے کیلئے فتنہ الخوارج نے مختلف اقدامات کیے، یہ پابندی اس جانب اشارہ کرتی ہے کہ فتنہ الخوراج کو پے درپے ہلاکتوں کا سامنا ہے۔

دفاعی ماہرین نے مزید کہا کہ موبائل فون کے استعمال پر پابندی کا مقصد سیکیورٹی فورسز کی نظر سے بچنا ہے، موبائل فون کے استعمال پر پابندی کا مقصد خارجیوں کے مواصلاتی نظام کو بھی خفیہ رکھنا ہے، موبائل فون استعمال پر پابندی سے ثابت ہوتا ہے کہ دہشتگردوں کیخلاف سیکیورٹی فورسز کی کارروائیاں مؤثر طریقے سے جاری ہیں۔