راولپنڈی: آپریشن سوئفٹ ریٹارٹ کے 6 سال مکمل ہونے پر چیئرمین جوائنٹ چیفس آف اسٹاف، سروسز چیفس نے مسلح افواج کو خراج تحسین پیش کیا۔

پاک فوج کے شعبہ تعلقات عامہ (آئی ایس پی آر) کے مطابق تینوں سروسزچیفس نے مسلح افواج کی بےمثال پیشہ ورانہ مہارت کو سراہا، آپریشن سوئفٹ ریٹارٹ بھارتی جارحیت کے جواب میں پاکستان کامتوازن ردعمل ہے۔

آئی ایس پی آر کے مطابق آپریشن سوئفٹ ریٹارٹ نے خودمختاری، علاقائی سالمیت کے تحفظ کے عزم کو اجاگر کیا، اس سے مسلح افواج کی آپریشنل تیاری اور مہارت سامنے آئی، اس آپریشن سے ثابت ہوا پاکستان کی مسلح افواج جارحیت روکنے کی صلاحیت رکھتی ہیں۔

ترجمان پاک فوج نے کہا کہ افواج فوری ڈیٹرنس دوبارہ قائم کرنے کی صلاحیت رکھتی ہیں، پورے معرکے میں پاکستان کی مسلح افواج نے آپریشنل بالادستی برقرار رکھی۔

چیئرمین جوائنٹ چیفس آف اسٹاف کمیٹی نے قومی سلامتی اور استحکام کو یقینی بنانے کےعزم کا اعادہ کیا اور علاقائی امن کوفروغ دینے کی مسلسل کوششوں کو جاری رکھنے پر بھی زور دیا۔

عسکری قیادت کے مطابق مسلح افواج ہمہ وقت چوکس اور کسی بھی خطرے کا مقابلہ کرنے کے لیے تیار ہیں، مسلح افواج عوام کے اعتماد پر ہمیشہ پورا اتریں گی۔

ترجمان پاک فوج نے مزید کہا کہ مسلح افواج ملک کی حفاظت کے لیے تیار ہیں، مسلح افواج علاقائی، عالمی امن کے لیے کردار ادا کررہی ہیں۔