راولپنڈی: چیف آف آرمی اسٹاف فیلڈ مارشل سید عاصم منیر نے عیدالاضحیٰ کے موقع پر لائن آف کنٹرول (ایل او سی) پر تعینات افواج کے اگلے مورچوں کا دورہ کیا۔

پاک فوج کے شعبہ تعلقات عامہ (آئی ایس پی آر) کے مطابق ایل او سی پہنچنے پر آرمی چیف کا استقبال کمانڈر راولپنڈی کور نے کیا، تاہم آرمی چیف نے یہ مقدس دن جوانوں کے ساتھ گزارا اور انہیں عید کی خصوصی مبارکباد دی۔

نمازِ عید کے بعد مادرِ وطن کے دفاع، ملک کے استحکام و ترقی، اور شہداء کے ایصالِ ثواب کے لیے خصوصی دعائیں کی گئیں۔ فیلڈ مارشل نے افسران و جوانوں کے پیشہ ورانہ عزم، مہارت اور قربانیوں کو سراہا۔

فیلڈ مارشل عاصم منیر کا کہنا تھا کہ اگلے مورچوں پر اہل خانہ سے دوری ایک اعلیٰ قومی فریضہ ہے جو مادرِ وطن کے تحفظ کے لیے انجام دیا جا رہا ہے، فوجی جوانوں کی قربانیاں ملک و قوم کے وقار کی علامت ہیں۔

آرمی چیف نے “معرکۂ حق” اور “آپریشن بنیانِ مرصوص” میں فارمیشن کی شاندار کارکردگی کو سراہا اور شہداء و غازیوں کو خراجِ عقیدت پیش کرتے ہوئے کہا کہ ان عظیم قربانیوں سے قوم کے عزم اور سلامتی کو تقویت ملی ہے۔

اپنے خطاب میں آرمی چیف نے کہا کہ معصوم پاکستانی شہریوں، خصوصاً بچوں، خواتین اور بزرگوں کی جانوں کے نقصان کا مؤثر اور دلیری سے بدلہ لیا گیا۔

آئی ایس پی آر نے بتایا کہ اس موقع پر انہوں نے مسئلہ کشمیر پر پاکستان کے اصولی مؤقف کو ایک بار پھر اجاگر کرتے ہوئے کہا کہ کشمیری عوام کی بھارتی قبضے کے خلاف منصفانہ اور بہادرانہ جدوجہد کو کبھی فراموش نہیں کیا جائے گا۔

آرمی چیف نے اس بات پر زور دیا کہ مسئلہ کشمیر کو کشمیری عوام کی خواہشات اور اقوام متحدہ کی سلامتی کونسل کی قراردادوں کے مطابق حل کیا جانا چاہیے۔