ترک وزیر دفاع یاسر گولر نے اپنے اعلیٰ سطحی وفد کے ہمراہ ایئر ہیڈ کوارٹرز اسلام آباد کا دورہ کیا، جہاں ان کی پاک فضائیہ کے سربراہ ایئر چیف مارشل ظہیر احمد بابر سدھو سے ملاقات ہوئی۔

انٹر سروسز پبلک ریلیشنز (آئی ایس پی آر) کے مطابق ملاقات میں دونوں ممالک کے درمیان دفاعی تعاون، علاقائی سلامتی اور مستقبل کی جنگی ضروریات سے متعلق تفصیلی گفتگو ہوئی۔

ملاقات کے دوران پاک ترک اسٹریٹیجک تعلقات، باہمی مفادات اور عسکری ہم آہنگی پر بھی زور دیا گیا۔

ترک وزیر دفاع اور ایئر چیف مارشل نے جدید ایویونکس، ڈرون ٹیکنالوجی اور ایرو اسپیس انڈسٹری میں باہمی اشتراک کے فروغ کی ضرورت پر اتفاق کیا۔

ایئر چیف مارشل ظہیر احمد بابر سدھو نے پائلٹ ایکسچینج پروگرام پر ترک وزیر دفاع کا شکریہ ادا کیا اور اسے پیشہ ورانہ تربیت اور آپریشنل ہم آہنگی کے فروغ کے لیے ایک اہم قدم قرار دیا۔

اس کے علاوہ دونوں فریقین نے تربیتی تعاون کو وسعت دینے اور مشترکہ فضائی مشقوں کے انعقاد پر بھی اتفاق کیا۔

یہ بھی پڑھیں: ترکیہ اچھے، بُرے دنوں میں پاکستان کے ساتھ کھڑا رہے گا، اردوان کا واضح اعلان

ملاقات میں مشترکہ ورکنگ گروپس کے قیام پر بھیاتفاق کیا گیا جو مستقبل میں دفاعی منصوبہ بندی اور ٹیکنالوجی کے تبادلے میں معاون ثابت ہوں گے۔

ترک وزیر دفاع نے پاک فضائیہ کی بھارت کے ساتھ حالیہ کشیدگی میں کارکردگی کی تعریف کی اور قومی خودمختاری کے دفاع میں ایئر چیف کی قیادت کو سراہا۔

دوران ملاقات ایئر چیف نے گفتگو کرتے ہوئے کہا کہ دونوں ممالک کی دفاعی صنعتوں کے درمیان تعاون کو مزید گہرا کرنے کی ضرورت ہے تاکہ جدید تقاضوں سے نمٹا جا سکے۔

 اس موقع پر ترک وفد نے ادارہ جاتی رابطوں کو مزید مضبوط بنانے کی خواہش کا اظہار کیا۔

آئی ایس پی آر کے مطابق ترک وزیر دفاع کا یہ دورہ نہ صرف پاک ترک دفاعی تعاون کے فروغ کی علامت ہے بلکہ باہمی اعتماد اور برادرانہ تعلقات کا عملی اظہار بھی ہے۔