ملک بھر میں اسکول کھولنے سے متعلق حتمی فیصلہ آئندہ ہفتے ہوگا۔

وفاقی وزیرتعلیم شفقت محمود نے معاون خصوصی برائے صحت ڈاکٹر فیصل سلطان کے ہمراہ پریس کانفرنس کرتے ہوئے کہا کہ اسکول کھولنے سے متعلق حتمی فیصلہ 7 ستمبر بروز پیر کو کیا جائے گا۔

شفقت محمود نے کہا کہ  ملک میں تعلیمی سرگرمیاں بحال کرنےسے متعلق مختلف تجاویز زیرغور ہیں ۔اسکول 15 ستمبر سے فیز وائز کھولنے جانے کی تجاویز ہیں  تاہم حتمی فیصلہ 7 ستمبر کو کیا جائے گا۔

اس موقع پر  معاون خصوصی برائے صحت ڈاکٹر فیصل سلطان نے کہا ہر بچے کا دو ہفتے بعد ٹیسٹ ہوگا۔

ڈاکٹر فیصل نے مزید کہا کہ  جن بچوں کی قوتِ مدافعت کم ہو انہیں پہلے مرحلے میں اسکول نہیں بھیجا جائے۔

معاون خصوصی برائے صحت کا کہنا تھا کہ  کورونا کم ضرور ہوا ہے  تاہم کوروناختم نہیں ہوا اورایس اوپیز پر عملدرآمد بہت ضرروی ہے۔

دوسری جانب   آل پاکستان پرائیویٹ اسکولز فیڈریشن نےوفاقی وزیر تعلیم شفقت محمود کی میڈیابریفینگ میں اسکولز15ستمبر سے فیزوائزکھولنے کا بیان تعلیم بحالی روکنے کی سازش قراردیتے ہوئے  مسترد  کردیا۔

صدر آل پاکستان پرائیویٹ اسکولز فیڈریشن کاشف مرزا نے کہا کہ ایس  او پیز   کے تحت ملک بھر میں اسکولز 15اگست سے کھول دیے ہیں ا ورتدریس کا سلسلہ جاری رہے گا۔

کاشف مرزا کا کہنا تھا کہ ایف آئی آر کاٹنا  اوراسکولز سیل کرنا ظالمانہ کاروائی ہے جس کی مذمت کرتے ہیں۔

انہوں نے کہا کہ 7.5کروڑ پاکستانی بچوں کےآئینی تعلیمی حقوق کے لیےتمام اسکولز باقاعدہ طورپر کھولنے کی توثیق کی جائے۔ گیلپ سروےمطابق 84فیصد  والدین اسکولز کھولنے کامطالبہ کررہے ہیں۔