پاکستان کی معروف اداکارہ ماورہ حسین اپنی منفرد اداکاری کی وجہ سے تو ہردلعزیز ہیں ہی لیکن اداکارہ نے ایک ایسا کام بھی کرنے کااعلان کردیا جس کو سن کر پاکستانیوں کاسر فخرسے بلندہوگیا۔

خوبرو اداکارہ نےآزاد کشمیر سے تعلق رکھنے والے طالب علم کی یونیورسٹی فیس اداکرنےکا اعلان کردیا۔

تفصیلات کے مطابق ماریہ احمد نامی خاتون صارف نے ماورا حسین کی انسٹاگرام پوسٹ پر اپنے بھائی کی یونیورسٹی فیس کی ادائیگی کے لیے مدد کی درخواست کی تھی جس میں  اداکارہ نے اپنی اس پوسٹ پر ساتھی اداکار فہد مصطفی ٰکوسالگرہ کی مبارک باد دی تھی۔

ماورا حسین نے اپنی پوسٹ میں لکھا کہ ’سالگرہ مبارک ہو میرے ہیرو، ہمیشہ ایسے ہی اچھے انسان رہنا جیسا کہ تم اب ہو، آپ کی سالگرہ پر میں دعاگو ہوں کہ یہ سال آپ کے لیے بہت زیادہ پیار، خوشیاں اور کامیابیاں لے کر آئے۔‘

خاتون کے مطابق  ان کے والدین 2005 میں آزاد کشمیر زلزلے میں اس دنیا سے رخصت ہوگئے تھے، وہ اور اس کا بھائی انتہائی مشکل حالات میں بھی اپنی تعلیم کا سلسلہ جاری رکھے ہوئے ہیں۔

ماریہ کے مطابق  ان کا بھائی ایک دکان پر ملازمت کرتا ہے اور ساتھ میں  ٹیوشن  پڑھا کر گھر کاخرچ اور تعلیمی اخراجات پورے کرتا ہے۔

خاتون  نے کہا کہ ان  کے بھائی کاداخلہ ایک اچھی یونیورسٹی میں ہورہا ہے لیکن اس کی فیس ادا کرنے کے لیے ان کے پاس رقم نہیں۔ اگر داخلہ نہ مل سکا تو تمام محنت پر پانی پھر جائے گا۔

خاتون نے پوسٹ میں درخواست کرتے ہوئے کہا کہ  وہ داخلہ فیس کیلئے اپیل کرنے پر بھی شرمندہ ہیں لیکن انکے پاس ایک ہی راستہ ہے۔

اداکارہ نے خاتون کی اپیل پر فوری جواب دیتے ہوئے کہا کہ وہ ان سے براہ راست رابطہ نہیں کرسکتیں لیکن ان کی ٹیم اس سلسلے میں تعاون کرے گی۔ اداکارہ نے خاتون سے تفصیلات مانگتے ہوئے کہا کہ انہیں فیس کی ادائیگی کرکے بہت خوشی ہوگی۔