لاہور کی مقامی عدالت نے اداکارہ میشا شفیع کے خلاف اداکار علی ظفر کے ہتک عزت کے دعوے پرگواہوں کو طلب کرلیا۔

تفصیلات کے مطابق لاہور کی مقامی عدالت نے علی ظفر کے باقی تمام گواہ طلب کرنے کا حکم نامہ جاری کردیا ہے۔

میشا شفیع کے خلاف علی ظفر کے ہتک عزت کے دعوے کی سماعت سیشن جج امجد علی شاہ کی عدالت میں ہوئی۔

عدالت نے علی ظفر کے باقی تمام گواہوں کو بیانات ریکارڈ کرانے کے لیے بارہ ستمبر کو بلالیا۔

واضح رہے کہ گلوکارعلی ظفر کے وکیل نے میشا شفیع کے خلاف لاہور سیشن کوٹ میں ایک ارب روپے ہتک عزت کا دعویٰ دائر کیا جس میں اُن کا کہنا تھا کہ میرے مؤکل پر ہراسگی کا جھوٹا اور بے بنیاد الزام لگایا گیا۔

وکیل کا کہنا تھا کہ میشا شفیع نے سستی شہرت کے لیے علی ظفر پر ہراساں کرنے کے الزامات لگائے اور لیگل نوٹس کے باوجود معافی نہیں مانگی لہذا عدالت سے استدعا ہے کہ وہ خاتون گلوکارہ کو 1 ارب ہرجانہ ادا کرنے کا حکم جاری کرے۔

یاد رہے کہ رواں برس اپریل میں گلوکارہ میشا شفیع نے علی ظفر پر جنسی ہراسانی کا الزام عائد کرتے ہوئے کہا تھا کہ علی ظفر نے انہیں ایک زائد بار جنسی طور پر ہراساں کیا ہے۔ علی ظفر نے ان الزامات پر میشا شفیع کو قانونی نوٹس بھیجا تھا

میشا شفیع کے وکیل بیرسٹرمحمد احمد پنسوٹا کا کہنا تھا کہ ہمیں نوٹس موصول ہوگیا ہے ہم جائزہ لے رہے ہیں،میشا کی جانب سے علی ظفر پر لگائے گئے تمام الزامات سچ پر مبنی ہے۔