پاکستان الیکٹرانک میڈیا ریگولیٹری اتھارٹی (پیمرا) نے اشتہارات میں بھارتی اداکاروں کو لینے پر پابندی لگا دی۔

تفصیلات کے مطا بقپاکستان الیکٹرانک میڈیا ریگولیٹری اتھارٹی (پیمرا) نے اپنے نوٹی فکیشن میں کہا ہے کہ کشمیر میں بھارتی جارحیت اور اس کے نتیجے میں دونوں ممالک کے درمیان ہونے والی کشیدگی کے پیش نظر بھارت میں بننے والے اور بھارتی اداکاروں پر مشتمل اشتہارات پر پابندی عائد کردی گئی ہے۔

Prohibition of TVCs produced in India / carrying Indian talent pic.twitter.com/IOtZrqzcfi

Advertisement

— Report PEMRA (@reportpemra) August 14, 2019

پیمرا نے صابن، واشنگ پاؤڈر، شیمپو، نوڈلز اور اس طرح کی دیگر اشیا بنانے والی 11 مختلف ملٹی نیشنل کمپنیز کے حوالے سے خاص طور پر متنبہ کیا ہے کہ ان کے بھارتی اداکاروں یا کرداروں والے اشتہارات ٹی وی ا سکرینوں پر نشر نہ کیے جائیں۔

پیمرا کی جانب سے جاری کردہ نوٹیفکیشن میں اس بات کو واضح کیا گیا ہے کہ خلاف ورزی کرنے والوں کے خلاف قانون کے مطابق کارروائی کی جائے گی۔

اعلامیے میں واضح کیا گیا ہے کہ حکومت پاکستان نے اعلان کیا تھا کہ 14 اگست کو کشمیر سے اظہار یکجہتی کے  طور پر منایا جائے گا تاہم اس دوران بھی بھارتی اشتہارات پاکستانی چینلز پر دکھائے جاتے رہے اور یہ عمل حکومتی پالیسی کے برعکس تھا۔

اسی بنا پر پیمرا نے مختلف مصنوعات کے ایسے اشتہارات پر پابندی عائد کردی ہے جو بھارت میں فلمائے گئے یا پھر ان میں بھارتی اداکار اور ماڈل شامل ہوں۔

پیمرا نے کہا ہے کہ پاکستانی ٹی وی چینلز پر بھارتی اداکاروں پر مبنی اشتہارات پاکستانیوں کی پریشانیوں میں اضافہ کرتے ہیں جو کشمیریوں پر کیے جانے والے بھارتی مظالم کی وجہ سے پہلے ہی غمزدہ ہیں۔

نوٹیفکیشن کے مطابق پیمرا آرڈیننس 2002 کے سیکشن 27 اے کے تحت لگائی جانے والی یہ پابندی اس وقت تک برقرار رہے گی جب تک بھارتی اداکاروں پر مبنی اشتہارات کو متبادل پاکستانی اداکاروں یا کرداروں کے ساتھ تبدیل نہیں کیا جاتا اور پیمرا ان کی منظوری نہیں دیتا۔

واضح رہے کہ پیمرا کی جانب سے یہ سخت اقدام اُٹھانے کی وجہ بھارت کی جانب سے رواں ماہ 5 اگست کو مقبوضہ کشمیر کی خصوصی حیثیت ختم کرنا ہے۔