قومی ایوارڈ یافتہ اداکارہ مہوش حیات یتیم خانے ’میرا اپنا گھر ‘کا افتتاح کرنے سوہاوہ پہنچ گئیں۔

تفصیلات کے مطابق مہوش حیات صوبہ پنجاب کے ضلع جہلم کی تحصیل سوہاوہ پہنچیں جہاں انہوں نے فری آئی کیمپ کا دورہ کیا اور کیمپ میں بچوں کی آنکھوں کے معائنے کا جائزہ لیا۔

سوہاوہ میں اداکارہ مہوش حیات نے اسکول کے بچوں سے ملاقات بھی کی اور بچوں سے گھل مل گئیں اس کے علاوہ انہوں نے مریضوں سے خیریت بھی دریافت کی۔

اس سے قبل کچھ عرصہ قبل مہوش حیات نے سندھ کے خستہ حال اسکولوں کی بحالی اور ان میں پڑھنے والے سیکڑوں بچوں کی تعلیم کا بیڑہ بھی اٹھایاتھا۔

اداکارہ مہوش حیات نے حال ہی میں برطانوی نشریاتی ادارے کو انٹرویو دیتے ہوئے کہا ہے کہ موجودہ دور میں صرف اداکار یا اداکارہ ہونا کافی نہیں بلکہ شائقین سے ملنے والی عزت اورطاقت کو استعمال کرتے ہوئے ہمیں اپنے  ملک، معاشرے اور دنیا کے مسائل کے حل میں بہتری لانی چاہئے۔

مہوش حیات کا کہنا تھا کہ میں نا صرف تفریح فراہم کرنے کا کام کررہی ہوں ، بلکہ وہ فلاحی کا م بھی کر رہی  ہوں جس سے لوگوں کی زندگیوں میں تھوڑی بہتری  آسکے۔

مہوش حیات نے بتایا کہ  ایک بین الاقوامی فلاحی تنظیم گلوبل چیریٹی پینی اپیل کے ساتھ مل کر پاکستان کے صوبہ سندھ کے غریب بچوں کی تعلیم کے لیے بھی کوششیں کررہی ہوں۔

ذرائع کے مطابق بچوں کے خستہ حال اسکولوں کےحال کی بہتری کے لیے مہوش حیات اگلے سال لندن میں منعقد ہونے والی میراتھن میں حصہ لیں گی اور صوبہ سندھ کے شہر سکھر میں 5 اسکولوں کی تعمیر کے لیے تقریباً ایک لاکھ یورو فنڈ اکھٹا کریں گی۔

مہوش  حیات نے بتایا کہ سکھر میں تقریباً 900 لڑکے اور لڑکیوں کے لیے 5 اسکول قائم کر رہے ہیں اور میرے لیے اس سے بڑی کوئی بات نہیں کہ تھوڑی سے کوشش سے غریب بچوں کا مستقبل سنوارسکوں۔

واضح رہے کہ  نشان امتیاز حاصل کرنے والی اداکارہ مہوش حیات کا شمار پاکستان کی مقبول اور باصلاحیت اداکاراؤں میں ہوتا ہے، جو اداکاری کے ساتھ فلاحی کاموں میں بھی پیش پیش رہتی ہیں اور ملکی معاملات میں بڑھ چڑھ کر حصہ لیتی ہیں ۔