ملتان ماڈل کورٹ میں قندیل بلوچ قتل کیس کی سماعت مکمل ہوگئی ہے ، عدالت نے فریقین کے دلائل اور گواہوں کے بیانات اور جرح مکمل ہونے کے بعد فیصلہ محفوظ کرلیا ہے جو کل سنایا جائیگا۔

ملتان کی ماڈل کورٹ کے جج عمران شفیع کل قندیل بلوچ قتل کیس کا حتمی فیصلہ سنائیں گے، ماڈل کورٹ میں قندیل بلوچ قتل کیس کو 3 اگست کو منتقل کیا گیا تھا جہاں روزانہ کی بنیاد پر اس کیس کی سماعت ہوئی۔

واضح رہے کہ فیس بک ویڈیوز سے شہرت حاصل کرنے والی ماڈل قندیل بلوچ کو ان کے بھائی نے 15 جولائی 2016 کو مبینہ طور پر غیرت کے نام پر قتل کردیا تھا۔

پولیس کے مطابق قندیل بلوچ کا بھائی ان کی تصاویر اور ویڈیوز وائرل ہونے کی وجہ سے ناراض تھا، جس پر وہ انہیں غیرت کے نام پر قتل کرکے فرار ہوگیا۔

کیس کے مدعی قندیل کے والد اسلم ماہڑہ نے اپنے 3 بیٹوں وسیم، عارف اور اسلم شاہین سمیت مفتی عبدالقوی، حق نواز، عبدالباسط اور ظفر کو اس کیس میں نامزد کیا تھا۔

 عادالت کے مطابق قندیل کی والدہ نے بعد میں ان کے تینوں بیٹوں کو معاف کرنے کی درخواست بھی دائر کی تھی لیکن عدالت کے مطابق قندیل بلوچ کے بھائیوں کو معاف کرنے سے قتل کیس میں نامزد دیگر ملزمان پر بھی فرق پڑے گا، اس وجہ سے عدالت نے والدین کی درخواست مسترد کردی تھی۔

کیس کا فیصلہ 3سال2ماہ اور 11دن کے طویل عدالتی کارروائی کے بعد سنایا جائیگا۔