پاکستان کی معروف اداکارہ و ماڈل سونیا حسین کا کہنا ہے کہ جب میں پیدا ہوئی تو رشتے داروں نے میری والدہ کو بیٹی پیدا ہونے کا طعنہ دیا۔

تفصیلات کے مطابق ایک نجی ٹی وی پروگرام میں گفتگو کرتے ہوئے سونیا حسین نے بتایا کہ میرا بچپن بہت مشکل سے گزرا ہے۔ میرے والد نے میری والدہ کو بیٹا نہ ہونے کی وجہ سے چھوڑ دیا تھا اور دوسری شادی کر لی تھی۔

اداکارہ نے بتایا کہ جب میں پیدا ہوئی تو رشتے داروں نے میری والدہ کو بیٹی پیدا ہونے کا طعنہ دیا اور میرے بعد اللہ نے پھر بیٹی کی رحمت سے نوازا جس پر میری والدہ کو مزید طعنے ملے اور ان تمام تر صورتحال پر میرے والد معاشرے کے دباؤ میں آگئے اور انہوں نے ہمیں چھوڑ دیا اور دوسری شادی کر لی۔

سونیا حسین نے مزید بتایا کہ میرے والد نے بیٹے کی خواہش میں دوسری شادی کی، دوسری بیوی سے ان کے ہاں بیٹا پیدا ہوا لیکن اس کے ٹھیک ایک ماہ بعد میری والدہ کو بھی اللہ تعالی نے بیٹے سے نوازا دیا۔

اداکارہ نے مزید بتایا کے بیٹے کی پیدائش کے بعد والد ہفتے میں دو تین دن ہمارے ساتھ بھی رہنے لگے تھے۔

والد کے ساتھ رہنے پرسوال کے جواب میں سونیا حسین نے کہا کہ اب ان کے اور ان کے والد کے درمیان وہ پہلے والا رشتہ باقی نہیں رہا، اب رشتے میں ایک خلیج حائل ہو گئی ہے۔

واضح رہے کہ سونیا حسین پاکستان شوبز انڈسٹری کی ایک انتہائی باصلاحیت اداکارہ، ماڈل، میزبان اور وی جے ہیں۔

کراچی سے تعلق رکھنے والی سونیا حسین 15جولائی 1991ء کو پیدا ہوئیں۔ ابتدائی تعلیم کراچی سے حاصل کرنے کے بعد انھوں نے کراچی یونیورسٹی سے ایم بی اے کی ڈگری حاصل کی۔

سات سال قبل جب اداکارہ سونیا حسین پاکستانی انٹرٹینمنٹ انڈسٹری کا حصہ بنیں، تب سے اب تک پروجیکٹس کے بہترین انتخاب کے باعث وہ اپنے لیے مضبوط جگہ بنانے میں کامیاب رہی ہیں۔

ٹیلی ویژن پر کئی ڈراموں میں بہترین پرفارمنس کا مظاہرہ کرنے کے علاوہ سونیا حسین کو پاکستان فلم انڈسٹری کا بھی ایک بہترین اثاثہ مانا جاتا ہے۔ سونیا حسین کی پہلی فلم ’مور‘تھی، جسے جامی نے ڈائریکٹ کیا تھا۔