پاکستانی شوبز انڈسٹری کی اداکارہ حرا مانی نے کہا ہے کہ مجھے  کامیاب ہونے کے لیے اداکار فواد خان کی ضرورت نہیں، اچھی پرفارمنس سے کامیاب زندگی گزاری جاسکتی ہے۔

 تفصیلات کے مطابق پاکستانی اداکارہ حرامانی کی ایک ویڈیو سوشل میڈیا پر وائرل ہورہی ہے جس میں وہ کامیاب زندگی کا طریقہ بتاتے ہوئے نظر آرہی ہیں ۔

حرا مانی کا اپنی ویڈیو میں کہنا تھا کہ مجھے  کامیاب ہونے کے لیے اداکار فواد خان یا ہدایتکارسنجے لیلا بھنسالی کی ضرورت نہیں ہے کیونکہ ایک انسان کو زندگی میں کامیاب ہونے کے لیے جس چیز کی ضرورت ہوتی ہے وہ ہے اچھی پرفارمنس اور وہ آپ کہیں بھی دے سکتے ہیں۔

پاکستانی شوبز انڈسٹری کی اداکارہ  نے کہا کہ میری طرح کوئی اداکار اپنے کرداروں سے کھیلتا نہیں ہے اور میں اپنے منہ سے یہ بات بول رہی ہوں کہ میں ایک واحد لڑکی ہوں جو اس انڈسٹری میں بچوں کے بعد ہیروئن بنی۔

حرا مانی نے  یہ بھی کہا کہ میں نے اپنے کیریئر کے پہلے ڈرامے ’پیرنہ کریو کوئی‘ میں مرکزی کردار ادا کیا تھا بعد ازاں انہوں نے اپنے دوسرے ڈرامے میں ثانوی کردار ادا کیا پھر مرکزی کردار ادا کیا اور پھر ثانوی کردار ادا کیا۔

پاکستانی شوبز انڈسٹری کی اداکارہ حرا مانی نے مزید  کہا کہ میں نے رسک لیا ہے کہ کیا میں دو بچوں کے ساتھ بھی ہیروئن بن سکتی ہوں یا نہیں  اورکیا لوگ بطور ہیروئن بچوں کی ماں کو قبول کریں گے۔

یاد رہے کہ اداکارہ حرا مانی نے 2008 میں اداکارو پروڈیوسر سلمان ثاقب شیخ عرف مانی سے شادی کی تھی جن سے ان کے دوبیٹے مزمل اور ابراہیم ہیں۔