ہندوستان کے معروف شاعر کیفی اعظمیٰ کی بیٹی اور بالی ووڈ اداکارہ شبانہ اعظمی ٹریفک حادثے میں شدید زخمی ہوگئیں۔

شبانہ اعظمی کو اسپتال میں طبی امداد دی جارہی ہے جبکہ ان کے شوہر معروف نغمہ نگار جاوید اختر ایکسیڈنٹ میں محفوظ رہے ہیں۔

حادثہ ہفتے کی سہ پہر تقریباً ساڑھے تین بجے ممبئی پونے ایکسپریس وے پراُس وقت پیش آیا جب وہ اپنے شوہر جاوید اختر کے ساتھ سفر کررہی تھیں۔

اُن کی کار ایک ٹرک سے ٹکراگئی جس کے نتیجے مین حادثہ پیش آیا، حادثے میں گاڑی کو شدید نقصان پہنچا اور اس کا اگلا حصہ مکمل تباہ ہوگیا۔

شبانہ اعظمی مودی کے خلاف میدان میں آگئیں

شبانہ اعظمی کو ایمبولینس میں ڈال کر اسپتال منتقل کیا گیا جبکہ ان کے شوہر  اور معروف نغمہ نگار جاوید اختر حادثے میں محفوظ رہے۔

شبانہ اعظمی اس وقت ممبئی کے ایم جی ایم اسپتال میں زیر علاج ہیں جبکہ پولیس واقعے کی تحقیقات کررہی ہے۔

امدادی ادارے اور ہائی وے پولیس نے زخمیوں کو فوری طور پر قریبی اسپتال منتقل کیا جہاں شبانہ اعظمی کی حالت خطرے سے باہر بتائی جارہی ہے۔ حکومت اور شوبز سے تعلق رکھنے والی شخصیات نے جاوید اختر کو فون کرکے خیریت دریافت کی اور اداکارہ کی مکمل صحت یابی کے لیے نیک تمناؤں کا اظہار کیا۔

خیال رہے کہ یہ ایک معتبر نام ہیں اور انہیں 1998 میں پدما شری ایوارڈ سے نوازا گیا تھا جبکہ وہ 5 بار نیشنل فلم ایوارڈ بھی اپنے نام کرچکی ہیں۔

واضح رہے کہ گذشتہ دنوں میں سماجی تعلقات کی  ویب سائٹ ٹوئٹر پر بھارت بھر میں مودی سرکار کے متنازع مسلم مخالف قانون کے خلاف مظاہروں کی حمایت میں پیغام جاری کیا جس میں انہوں نے کہا کہ اگرچہ میں بیرون ملک میں ہونے کی وجہ سے ذاتی طور پر مظاہرے میں شامل نہیں ہوں لیکن میں مکمل طور پر حمایت کرتی ہوں۔