19 سالہ ایلزبتھ ہومز نے ارب پتی بننے کے لئے دنیا کو بے وقوف بنادیا ،اس کم عمر لڑکی پر عمر قید کی تلوار لٹکنے لگی ہے۔

غیر ملکی میڈیا رپورٹ کے مطابق ایلزبتھ ہومز جو اسٹیو جابس بننا چاہتی تھیں ،وہ تاریخ کی کم عمر ترین سیلف میڈ ارب پتی خاتون بھی بن گئیں لیکن ان کا دنیا میں ’انقلاب‘ دراصل ایک دھوکا تھا اب ایلزبتھ پر 20 سال قید اور لاکھوں ڈالرز جرمانے کی تلوار لٹکنے لگی ہے۔

سوال یہ ہے کہ کس طرح ایک 19 سال کی لڑکی نے دنیا کی بڑی بڑی شخصیات کو بے وقوف بنایا؟

ایلزبتھ ہومز کی کمپنی ’تھیرانوس‘ کی مالیت 9 ارب ڈالرز تھی، جس کا دعویٰ تھا کہ ان کی ٹیکنالوجی محض خون کے چند قطروں سے سینکڑوں ٹیسٹ کرسکتی ہے، دراصل یہ دھوکہ تھا جس کی بدولت الزبتھ ہومز کی کمپنی میں بڑی بڑی شخصیات اور ٹیکنالوجی کمپنیوں نے کروڑوں ڈالرز کی سرمایہ کاری بھی کی۔

یاد رہے کہ اگست 2015ء میں صحت کے حوالے سے امریکی ادارے ایف ڈی اے نے تھیرانوس کے بارے میں اپنی تحقیقات کا آغاز کیا، جس سے پتہ چلا کہ ان کے ٹیسٹ نظام میں ’بڑی خامیاں‘ ہیں، ایف ڈی اے کے بعد 2015 اکتوبر میں مشہور امریکی اخبار وال اسٹریٹ جرنل سے وابستہ صحافی جان کریرو نے بھی تحقیقات شائع کردی جو کمپنی کے زوال کا باعث بنی۔

میڈیا رپورٹس میں بتایا گیا ہے کہ وال اسٹریٹ جنرل کے مالک روپرٹ مرڈوک بھی ’تھیرانوس‘ میں سرمایہ رکھتے تھے۔

ایلزبتھ ہومز کوخبر ہوگئی تھی کہ وال اسٹریٹ جرنل میں خبر شائع ہونے والی ہے مگر مرڈوک نے انہیں کہا کہ مجھے اپنے ایڈیٹر پر بھروسہ ہے، اگر خبر میں کوئی کمی یا خامی ہوئی تو وہ اسے شائع نہیں کریں گے لیکن یہ خبر شائع ہو گئی۔

جس کے بعد جولائی 2016 میں ہومز پر لیب ٹیسٹنگ انڈسٹری پر دو سال کی پابندی عائد کردی گئی اور اکتوبر میں تھیرانوس کو بند کر دیا گیا ساتھ ہی ساتھ اس کے لیب آپریشنز اور سینٹرز کو بھی سیل کردیا۔

تحقیقات مکمل ہونے کے بعد مارچ 2018ء میں تھیرنوس، ایلزبتھ ہومز اور رمیش بلوانی پر سکیورٹیز اینڈ ایکسچینج کمیشن کی جانب سے ’کھلی دھوکا دہی‘ کا مقدمہ دائر کیا گیا۔

امریکی حکام کی جانب سے دھوکہ کرنے کے الزام میں ایلزبتھ کو 10 سال تک کسی بھی کمپنی کے ڈائریکٹر یا افسر بننے پر بھی پابندی عائد کردی گئی ہے۔

واضح رہے کہ ان تمام واقعات کے دوران 2019ء کے وسط میں ایلزبتھ نے ایونز ہوٹل گروپ کے مالک کے بیٹے 27 سالہ ولیم ایونز سے شادی بھی کرلی اور ان دنوں دونوں سان فرانسسکو میں مقیم ہیں۔