پاکستان ڈراما انڈسٹری کی مقبول اداکارہ ثانیہ سعید نے کہا ہے کہ ہمیں ہر صورت ڈرامہ مصنفین کو بدلنے کی ضرورت ہے۔

اداکارہ نے ایک انٹرویو میں کہا ہے کہ میں اچھی اداکاری کر سکتی ہوں لیکن اگر اچھا اسکرپٹ نہیں ہے تو میں کچھ نہیں کرسکتی۔

[amazonad category=”Auto”]

ثانیہ سعید نے کہا کہ ڈرامہ سیریل ‘رقیب سے’ کی مثال لے لیں، اس ڈرامے میں ہدایت کار نے اداکاروں سے بہت ہی عمدہ کام لیا ہے۔

تھیٹر کے حوالے سے گفتگو کرتے ہوئے ثانیہ سعید نے کہا کہ کسی بھی اداکار نے اگر تھیٹر کیا ہو تو اسے فائدہ ضرور ہوتا ہے لیکن اگر نہیں بھی کیا تو کوئی بات نہیں دنیا میں بہت سے اداکار ایسے ہیں جنہوں نے کبھی تھیٹر کیا ہی نہیں لیکن اس کے باوجود وہ بہت بہترین اداکار ثابت ہوئے۔

نئے فنکاروں کے حوالے سے ثانیہ سعید کا کہنا تھا کہ وہ آج کل کے اداکاروں کی اداکاری کو بہت پسند کرتی ہیں حالانکہ ان کو اچھے سکرپٹس نہیں دیے جارہے لیکن اس کے باوجود وہ کیسے کمال دکھا رہے ہیں اس پر میں بہت حیران ہوتی ہوں۔

ایک سوال کے جواب میں ثانیہ سعید نے کہا کہ اگر دیکھنے والے کو کسی بھی اداکار کی اداکاری اور چہرے پر اطمینان نظر آئے تو اس کا مطلب ہے کہ اس کی پریکٹس اور تجربہ بہت زیادہ ہے۔

ثانیہ سعید نے کہا کہ پرانے لکھاریوں کو صرف مشہور ہونے کا شوق نہیں تھا ان کے اندر ایک وبال تھا کہ ان کی سوچ کیا ہے ، حسینہ معین اور انور مقصود کے اسکرپٹ پی ٹی وی پر تو بہت چلے لیکن باقی لوگوں کے ساتھ ان کی بات نہ بنی حالانکہ کے رائٹرز تو وہی تھے۔

انہوں نے مزید کہا کہ آپ جس نظریے سے سوچتے ہیں اس سے ہٹ کر اگر آپ کو سوچنے پر مجبور کر دیا جائے تو یہی ڈرامہ ہے اور یہی ڈرامے کا کام ہے۔