گلوکارہ و  اداکارہ کومل رضوی نے معروف سماجی کارکن عبدالستار ایدھی مرحوم کے ہمراہ ماضی میں وائرل ہونے والی تصویر کی وضاحت کردی۔

تفصیلات کے مطابق کومل رضوی نے حال ہی میں ایک پروگرام میں شرکت کی جہاں انہوں نے انٹرویو دیتے ہوئے کچھ سال قبل وائرل ہونے والی تصویر کا تذکرہ کیا۔

[amazonad category=”Auto”]

انہوں نے بتایا کہ یہ اس وقت کی بات ہے جب عبدالستار ایدھی ڈائیلائسس کے لئے اسپتال میں زیرِ علاج تھے، ان کی طبیعت کافی خراب تھی تو میں نے سوچا ایک بار ان سے مِل لوں، اس سے پہلے کہ بہت دیر ہو جائے۔

گلوکارہ کا کہنا تھا کہ وہاں پہنچنے پر ایدھی صاحب کے بیٹے نے مجھ سے فرمائش کی کہ اگر آپ برا نا مانیں تو گانا ’لمبی جدائی‘ سنا دیں، میں نے گانا سنایا تو انہوں نے میرے ساتھ سیلفی لی۔

انہوں نے کہا کہ اس کے بعد میری بھی ہمت ہوئی تو میں نے ایدھی صاحب سے سیلفی کا پوچھ لیا۔

کومل کا کہنا تھا کہ ایک تصویر میں ایدھی صاحب کی آنکھ بند ہوگئی اور میں نے جلدی میں وہ تمام تصویریں سوشل میڈیا اکاؤنٹس پر پوسٹ کر دیں،اگلی صبح میرے بھائی کا فون آیا اور اس نے کہا تم وہ سیلفی ڈیلیٹ کرو۔

گلوکارہ کا مزید کہنا تھا کہ میں نے صاف انکار کر دیا کیونکہ میں نے کچھ غلط نہیں کیا تھا۔

تاہم اس واقعے کے بعد وہ تصاویر سوشل میڈیا پر وائرل ہوگئیں جن پر صارفین نے ہزاروں کی تعداد میں میمز بنا ڈالیں۔

کومل نے بتایا کہ اس ٹرولنگ کی وجہ سے میں 2 سے 3 دِن تک روتی رہی لیکن میرے والد نے مجھ سے کہا کہ اتنے سال سے تم انڈسٹری میں ہو شکر کرو  یہ ایک اسکینڈل ایدھی صاحب کے ساتھ ہی بنا ہے۔