بالی وڈ کی معروف اور نوجوان اداکارہ عالیہ بھٹ کی ایک نئی اشتہاری ویڈیو سامنے آئی ہے جس پر بھارتیوں نے شدید غصے کا اظہار کیا ہے۔

میڈیا رپورٹس کے مطابق اداکارہ عالیہ بھٹ نے حال ہی میں شادی کے ملبوسات بنانے والی بھارت کی معروف کمپنی نے ایک نئے آئیڈیا کے ساتھ ایک اشتہار شوٹ کیا ہے۔

اس اشتہار میں اداکارہ عالیہ بھٹ ایک دلہن کا کردار ادا کر رہی ہیں جو کہ شادی کے منڈپ میں اپنے ہونے والے شوہر کے ساتھ بیٹھی  اپنے خاندان کے ہر فرد، دادی، والد، والدہ کی عالیہ کے ساتھ شفقت اور محبت کا ذکر کرتی ہے۔

لیکن جب کنیادان کی رسم شروع ہوتی ہے تو وہ اس رسم کے خلاف بولتی ہے اور کہتی ہے، ”میں کوئی دان کرنے کی چیز ہوں؟ کیوں صرف کنیا دان!”تاہم یہ دلہن اس وقت خوش گوار حیرت سے دوچار ہوتی ہے اس کے والدین کے ساتھ ساتھ اس کے ہونے والے سسر اور ساس بھی اپنے بیٹے کو بڑی خوشی کے ساتھ ‘دان‘ میں دے دیتے ہیں۔ اس منظر کو دیکھ کر ہر کوئی خوشی سے جھوم اٹھتا ہے۔ دلہن اس پر کہتی ہے، ”نیا آئیڈیا، کنیا مان!‘‘

اس اشتہار کی مخالفت کرنے والے بعض صارفین نے لکھا ہے کہ تمام برانڈ بار بار صرف ہندو رسوم و رواج اور روایات کو ہی نشانہ کیوں بناتے ہیں۔

مسلمانوں کے رسوم و رواج کو نشانہ کیوں نہیں بنایا جاتا۔

انہوں نے عالیہ بھٹ اور اشتہار تیار کرانے والی کمپنی کے پراڈکٹس کا بائیکاٹ کرنے کی بھی اپیل کی ہے۔