پاکستان کے لیجنڈری فنکار عمر شریف کی طبیعت میں بہتری کے بعد انہیں آج ایئرایمبولینس کے ذریعے امریکہ منتقل کرنے کا فیصلہ کیا گیا ہے۔

تفصیلات کے مطابق کراچی کے نجی اسپتال میں زیر علاج فنکار عمر شریف  ہفتے کی شب سے انتہائی نگہداشت وارڈ میں داخل تھے جبکہ ان کی حالت کو دیکھتے ہوئے ڈاکٹرز نے انہیں امریکہ جانے سے منع کردیا تھا۔

لٰہذا آج عمر شریف کی طبیعت میں بہتری دیکھنے اور ڈاکٹر کی مشاورت کے بعد انہیں امریکہ جانے کی اجازت دے دی گئی ہے۔

ڈاکٹرز پر اُمید ہیں کہ عمر شریف کی صحت اسی طرح برقرار رہی تو آج دوپہر انہیں ائیر ایمبولینس میں امریکہ روانہ کردیا جائے گا۔

ڈاکٹرز کے مطابق عمر شریف کی صحت 2 روز پہلے کی طرح معمول پر آگئی ہے، ائیر ایمبولینس کے ڈاکٹرز کی ٹیم نے پیر کی سہہ پہر کے بعد رات کو بھی نجی اسپتال میں عمر شریف کا معائنہ کیا تھا۔

فیملی ذرائع کے مطابق غیرملکی ڈاکٹرز نے عمر شریف سے گفتگو بھی کی، عمر شریف نے اپنی صحت کے بارے میں ڈاکٹرز کو خود جوابات دیے۔

ذرائع کا کہنا ہے کہ عمر شریف کو ایمبولینس میں کل صبح 9 بجے سے 11 بجے کے درمیان کراچی ائیرپورٹ پہنچایا جائے گا جبکہ ائیر ایمبولینس کے ڈاکٹرز عمر شریف کے معائنہ کے لیے اسپتال میں موجود ہیں۔