پاکستان کے لیجنڈری اداکار سہیل اصغر کا انتقال سے دو روز قبل آخری آڈیو پیغام سامنے آگیا۔

اُنہوں نے یہ آڈیو اپنے بیمار دوست نور الحسن کو بھیجا تھا جبکہ یہ پیغام پنجابی زبان میں تھا۔

اس آڈیو میں سہیل اصغر کو اپنے دوست سے کہتے ہوئے سُنا جاسکتا ہے کہ بیمار کی دُعا، بیمار کو لگتی ہے۔

انہوں نے کہا کہ میرا رب بیٹھے بِٹھائے اپنی آزمائش بھیج دیتا ہے لیکن شکر الحمداللّہ کہ میرے رب نے کبھی میرا ہاتھ نہیں چھوڑا، ہر آزمائش میں میرا ہاتھ تھام کر رکھا۔

سہیل اصغر نے کہا کہ نہ جانے ہم ایسا کیا کر بیٹھے کہ اللّہ تعالیٰ کو اتنے پیارے ہوگئے، کہتے ہیں کہ جو بندہ اللّہ کو عزیز ہوتا ہے، آزمائش بھی اُسی کو دی جاتی ہے، میرا رب بہتر جانتا ہے کہ میں نے کبھی کسی کا بُرا نہیں چاہا، ہر ایک کے لئے اچھا سوچا اور اچھا چاہا۔

اداکار نے کہا کہ اللّہ پاک نے ہمیشہ مجھے سرخرو کیا اور انشاءاللّہ، آگے بھی کرے گا، میرا رب میرے ساتھ ہے، میری ہر ایک ایک سانس کے ساتھ ہے۔

اداکار سہیل اصغر آخر میں اپنے دوست کی جلد صحتیابی اور خوشیوں سے بھرپور زندگی کے لئے دُعا بھی کی۔

واضح رہے کہ  سہیل اصغر ڈیڑھ سال سے بیمار تھے اور دو روز قبل 13 نومبر کو دُنیا سے کوچ کرگئے۔