پاکستان کے معروف اداکار فواد خان نے امریکی ویب سیریز مس مارول کا حصّہ ہونے کی تصدیق کردی ہے۔

اداکار نے بھارتی میڈیا کو انٹرویو دیتے ہوئے کہا کہ وہ سیریز مس مارول کاحصّہ ہیں اور اس سیریز کی شوٹنگ ایک زبردست تجربہ تھا۔

انہوں نے کہا کہ میں نے جس کاسٹ اور جن لوگوں کے ساتھ کام کیا ہے وہ بہت اچھے تھے لیکن انہیں افسوس ہے کہ اس وقت وہ اِس سے زیادہ اور کچھ نہیں کہہ سکتے۔

یاد رہے کہ پچھلے کچھ عرصے سے فواد خان کے بارے میں یہ خبریں گردش کررہی تھیں کہ انہیں امریکی ویب سیریز مس مارول کی کاسٹ میں شامل کیا گیا ہے۔

برطانوی نشریاتی ادارے کے صحافی ہارون رشید نے ٹوئٹر پر انٹرٹینمنٹ کی دنیا کی اس بڑی خبر کے بارے میں بتایا تھا۔

انہوں نے اپنے ٹوئٹ میں لکھا تھا کہ زبردست، فواد خان مس مارول میں اداکاری کے جوہر دکھانے کے لئے تیار ہیں۔

انہوں نے لکھا تھا کہ ڈزنی پلس کی یہ سیریز مس مارول، مارول اسٹوڈیوز کے پہلے مسلمان کردار کے بارے میں ہے۔

واضح رہے کہ فواد خان پاکستان شوبز انڈسٹری کے نامور اداکار ہیں۔

انہوں نے اپنی شاندار اداکاری کے ذریعے نہ صرف پاکستانی ٹیلی ویژن اور فلم انڈسٹری میں بلکہ سرحد پار ہندوستان میں بھی بہت نام کمایا ہے۔