پاکستان کی ابھرتی ہوئی نوجوان اداکارہ ایمن سلیم نیشنل اسٹیڈیم کراچی میں اپنے والد کی تصویر دیکھ کر بہت خوش ہوئیں۔

اداکارہ کی جانب سے انسٹا اسٹوری پر نیشنل اسٹیڈیم کراچی سے ایک ویڈیو شیئر کی گئی ہے۔

شئیر کی گئی ویڈیو میں دیکھا جاسکتا ہے کہ ایمن سلیم نیشنل اسٹیڈیم کراچی میں آویزاں کرکٹرز کی تصاویر میں اپنے والد سلیم یوسف کی تصویر دیکھ کر بہت خوش ہوئیں۔

اداکارہ اپنی فیملی اور قریبی دوستوں کے ساتھ گزشتہ روز کراچی کے نیشنل اسٹیڈیم میں پاکستان اور ویسٹ انڈیزکے درمیان ٹی ٹوئنٹی سیریز کا تیسرا اور آخری میچ دیکھنے کے لئے گئی تھیں۔

واضح رہے کہ اداکارہ ایمن سلیم سابق کرکٹر سلیم یوسف کی صاحبزادی ہیں جن کا شمار 80 کی دہائی کے پاکستان کے نامور وکٹ کیپر اور بلے بازوں میں کیا جاتا ہے۔

یاد رہے کہ پاکستانی ڈرامہ انڈسٹری کی مقبول ترین جوڑی اداکار ارسلان نصیر اور اداکارہ ایمن سلیم کو ایک بار پھر ایک ساتھ دیکھا جائے گا۔

اس حوالے سے جاری رپورٹس میں بتایا گیا ہے کہ ارسلان نصیر اور ایمن سلیم کو رمضان کے خصوصی ڈرامے میں ایک بار پھر ایک ساتھ کاسٹ کیا جائے گا۔

اس ڈرامے کے حوالے سے ابھی تک کوئی اطلاعات موصول نہیں ہوئیں ہیں تاہم دونوں اداکار مرکزی کردار ادا کریں گے۔

اس ڈرامے کی رائٹر صائمہ اکرم چوہدری ہیں جبکہ اس کی ہدایتکاری دانش نواز انجام دیں گے۔

خیال رہے کہ گزشتہ سال ارسلان نصیر اور ایمن سلیم کی جوڑی کو صارفین کی جانب سے بہت پسند کیا گیا تھا جو کہ رمضان المبارک کے خصوصی ڈرامہ میں پہلی بار ساتھ نظر آئے تھے ۔