بالی ووڈ اداکارہ کرینہ کپور اور اداکارہ امریتا اروڑا کورونا وائرس سے صحتیابی کے فوراً بعد دوبارہ پارٹی کرنے پر تنقید کی زد میں آگئیں۔

بھارتی میڈیا کے مطابق دونوں اداکاراؤں کو کورونا سے صحتیابی کے بعد اپنے قریبی دوستوں اور اہلخانہ کے ہمراہ دوبارہ کرسمس کا جشن مناتے ہوئے دیکھا گیا۔

 سوشل میڈیا صارفین کی جانب سے اداکارہ کرینہ اورامریتا پر شدید تنقید کی جارہی ہے۔

ایک صارف نے  کہا کہ جس دن ان کا کورونا ٹیسٹ منفی آیا اسی دن پارٹی کرنے پہنچ گئیں۔

ایک اور صارف نے کہا کہ دوبارہ پارٹی شروع اس ہی پارٹی میں تو کورونا ہوا تھا ۔

صارفین کا کہنا ہے کہ کرینہ کپور اور امریتا اروڑا کو اب زیادہ احتیاط کرنی چاہئیے۔

اس سے قبل بھارتی اداکارہ کرینہ کپور کے اومیکرون ٹیسٹ کی رپورٹ منفی آئی تھی۔

برہان ممبئی میونسپل کارپوریشن (بی ایم سی) کا کہنا تھا کہ کرینہ کپور نے رواں مہینے کے اوائل میں اپنے دوستوں کے ساتھ پارٹی کی تھی اور اس کے بعد انہوں نے اپنا کورونا وائرس کا ٹیسٹ کروایا جو مثبت آیا تھا۔

واضح رہے کہ فلم پروڈیوسر ریحا کپور کے گھر پارٹی کرنے کے بعد دونوں اداکاراؤں کو کورونا کی تشخیص ہوئی تھی جس کے بعد انہوں نے خود کو قرنطینہ  کرلیا تھا۔

کورونا کی تشخیص کے بعد ان کی فیملی اور رابطے میں رہنے والے تمام عزیزوں کا بھی کورونا ٹیسٹ کروایا گیا جو کہ منفی آیا تھا۔

بی ایم سی کی جانب سے اداکارہ کے گھر کو بھی سینیٹائز کر کے سیل کردیا گیا تھا تاہم کرینہ کے لئے جلد صحتیابی کی دعائیں کی جارہی تھیں۔

اس سے قبل کرینہ کپور خان نے قرنطینہ میں اپنے آخری 2 روز کی گنتی شروع کردی تھی۔

اس حوالے سے اپنے سوشل میڈیا اکاؤنٹ کی اسٹوری پر ایک پوسٹ بھی جاری کی تھی ۔

اس پوسٹ میں اداکارہ نے لکھا تھا کہ قرنطینہ میں ان کے 12 دن گزر چکے ہیں اور اب صرف 2 دن رہ گئے ہیں۔

اس کے ساتھ  ہی اداکارہ نے سب کو اپنی حفاظت کرنے اور اس وباء سے محفوظ رہنے کی ہدایت کی تھی۔

انہوں نے قرنطینہ کے دوران لی جانے والی سیلفی بھی شیئر کی تھی جس میں وہ خوب تیار ہوئی نظر آرہی تھیں۔

اس تصویر کو شیئر کرتے ہوئے اداکارہ نے لکھا کہ پاجامہ، لپ اسٹک اور سیلفی کے لئے پاؤٹ ایک بہترین ملاپ ہے۔

یاد رہے کہ کرینہ کپور 13 دن قرنطینہ میں گزارے تاہم انہوں نے اب اپنا اومیکرون کا ٹیسٹ کروایا جس کی رپورٹ میں ٹیسٹ کا رزلٹ  منفی آیا ہے۔