مس یونیورس 2021 کا ٹائٹل جیتنے والی بھارتی حسینہ ہرناز سندھو اداکارہ پریانکا چوپڑا کا سہارا لے کر فلموں میں آنا چاہتی ہیں۔

ہرناز سندھو نے اپنے انٹرویو میں اداکارہ اور سابقہ مس ورلڈ پریانکا چوپڑا کے نام کی آڑ لے کر فلموں میں آنے کا عندیہ دے دیا۔

ہرناز نے کہا کہ ان کی خواہش ہوگی کہ وہ اداکارہ پریانکا چوپڑا پر بنائی جانے والی بائیوپک میں کام کریں۔

انہوں نے کہا کہ میں اس بائیوپک کا حصہ بننا پسند کروں گی، میرا خیال ہے کہ انہوں نے میری اس جدوجہد میں مجھے بے حد متاثر کیا اور مجھ جیسے دیگر افراد کو بھی متاثر کرتی رہیں گی۔

یاد رہے کہ ہرناز سندھو کے فلموں سے جڑے مستقبل کو لے کر چہ مگوئیاں جاری ہیں۔

اس سے قبل ہرناز سندھو نے بالی ووڈ کے معروف اداکار شاہ رخ خان کے ساتھ کام کرنے کی خواہش کا اظہار کیا تھا۔

ہرناز سندھو نے اپنے انٹرویو میں بتایا تھا کہ میں شاہ رخ خان سے بہت متاثر ہوں جس طرح وہ محنت سے کام کرتے ہیں۔

انہوں نے کہا کہ کنگ خان آن اسکرین اور آف اسکرین بہت ہی نرم مزاج انسان ہیں۔

 واضح رہے کہ21 سال بعد بھارتی ریاست پنجاب سے تعلق رکھنے والی حسینہ ہرناز سندھو نے مس یونیورس 2021 کا ٹائٹل جیت کر ایک بار پھر بھارت کے نام یہ اعزاز کر دیا ہے۔

ہرناز سندھو مس یونیورس کا خطاب اپنے نام کرنے والی تیسری لڑکی ہیں جن کا تعلق بھارت سے ہے۔

یاد رہے کہ یہ مقابلہ حسن اسرائیل کے شہر ایلات میں منعقد ہوا تھا۔

2020 کی مس یونیورس کی فاتح میکسیکو کی اینڈریا میزا نے ہرناز سندھو کو تاج پہنایا۔

ہرناز سندھو 17 سال کی عمر سے مقابلہ حسن میں حصہ لے رہی ہیں۔

ہرناز سندھو سال 2000 میں پیدا ہوئیں جب لارا دتہ نے مس ​​یونیورس کا ٹائٹل جیتا تھا۔

انڈین ریاست پنجاب سے تعلق رکھنے والی 21 سالہ ہرناز سندھو نے پیراگوئے کی نادیہ فریرا اور جنوبی افریقہ کی لالیلا مسوانے کو شکست دے کر ٹائٹل جیتا ہے۔