آن لائن مسلم خواتین کی نیلامی پر بھارت کے نغمہ نگار جاوید اختر کا سخت ردعمل سامنے آیا ہے۔

سماجی رابطے کی مائیکرو بلاگنگ ویب سائٹ ٹوئٹر پر جاری بیان میں بھارت کے معروف نغمہ نگار جاوید اختر نے مودی کو آڑے ہاتھوں لیا ہے، انہوں نے کہا کہ میں سب کی خاموشی پر حیران ہوں، خاص کر پی ایم مودی کی خاموشی پر۔

There is an online auction of hundred women There are so called Dharm Sansads , advising the army the police n the people to go for the genocide of almost 200 MLN Indians .I am appalled with every one ‘s silence including my own n particularly of The PM . Is this Sub ka saath ?

— Javed Akhtar (@Javedakhtarjadu) January 3, 2022

انہوں نے وزیر اعظم مودی سے سوال کرتے ہوئے پوچھا کہ کیا ’سب کا ساتھ‘ یہی ہے؟، سینکڑوں خواتین کی آن لائن نیلامی ہورہی ہے، نام نہاد دھرم سنسد فوج اور پولیس کو تقریباً 20 کروڑ ہندوستانیوں کا قتل عام کرنے کا مشورہ دے رہی ہے۔

جاوید اختر کی جانب سے اس بیان کے بعد انہیں سوشل میڈیا پر ہندوتوا نظریے کے پیروکاروں کی جانب سے سخت تنقید کا نشانہ بنایا جارہا ہے۔

دوسری جانب بھارت میں شدید غم و غصے کے بعد مسلم خواتین کی آن لائن نیلامی کرنے والی ویب سائٹ کو بند کردیا گیا ہے جبکہ نیلامی کرنے والے بھارتی شخص کو بھی گرفتار کرلیا گیا ہے۔

غیر ملکی میڈیا رپورٹس کےمطابق بھارتی پولیس نے 21 سالہ شخص کو گرفتار کیا ہے جس کی شناخت تاحال ظاہر نہیں کی گئی ہے البتہ اس شخص کو انجینئرنگ کا طالب علم بتایا جارہا ہے جبکہ اس شخص کا تعلق بھارت کے جنوبی شہر بنگلور سے ہے۔

امریکی میڈیا کے مطابق بھارتی حکومت نے مسلم خواتین کی آن لائن نیلامی کے حوالے سے تحقیقات کا آغاز کرتے ہوئے اس ویب سائٹ کو بند کردیا ہے۔ امریکی میڈیا کے مطابق اس ویب سائٹ کے عملی اشارے نہیں ملے اور اس ویب سائٹ کا مقصد مسلم خواتین کو ہراساں و پریشان کرنا ہی تھا۔

یاد رہے کہ بھارت میں ایک سال کے دوران ایسی دوسری ویب سائٹ سامنے آئی ہے جبکہ اس جعلی ویب سائٹ پر پاکستان کی نوبل انعام یافتہ ملالہ یوسفزئی سمیت بھارتی اداکار شبانہ اعظمی، بھارتی مسلمان صحافی عصمت آرا اور سینکڑوں خواتین کو نیلامی کے لیے پیش کیا گیا تھا۔