بھارت کے معروف کامیڈین کپل شرما کے ساتھی اداکار تیرتھ آنند راؤ نے زہر کھالیا ہے۔

بھارتی میڈیا کے مطابق تیرتھ آنند راؤ نے کورونا وائرس کے باعث ہونے والی مالی پریشانیوں کے سبب زہر کھایا ہے۔

 تیرتھ آنند نے 27 دسمبر کو زہر کھا کر خودکشی کرنے کی کوشش کی تاہم خوش قسمتی سے ان کے پڑوسیوں نے انہیں صحیح وقت پر اسپتال پہنچا دیا تھا جس کی وجہ سے ان کی زندگی بچ گئی۔

بھارتی کامیڈین کا کہنا تھا کہ یہ قدم اٹھانے کی وجہ مالی مشکلات ہیں جن کے سبب گھر والوں نے بھی ساتھ چھوڑ دیا ہے یہاں تک کہ اسپتال میں بھی ان کی ماں اور بھائی ملنے نہیں آئے۔

واضح رہے کہ تیرتھ آنند راؤ گزشتہ 15 برس سے شوبز کی دنیا سے وابستہ ہیں وہ کامیڈین ہونے کے علاوہ معروف بھارتی اداکار نانا پاٹیکر کے ہمشکل کے طور پر بھی جانے جاتے ہیں۔

تیرتھ آنند راؤ نے کپل شرما اور بھارتی ٹی وی کی معروف اداکارہ شوئیتا تیواری کے ساتھ  کامیڈی سرکس کے عجوبے میں بھی کام کیا تھا۔

گزشتہ دو برسوں سے بھارت میں کورونا کے باعث کئی چھوٹے فنکار شدید پریشان ہیں اور مالی مشکلات کا سامنا کررہے ہیں، کچھ فنکاروں نے تو اس مشکل صورتحال میں سوشل میڈیا پر دیگر فنکاروں سے مالی امداد کی درخواست بھی کی تاہم کچھ لوگوں نے اپنی زندگی کا خاتمہ کرنے کی کوشش بھی کی۔