پاکستانی نژاد ہالی ووڈ اداکار زہیر خان کا کہنا ہے کہ پاکستانی فلم انڈسٹری غیرمعمولی ٹیلنٹ سے بھری ہوئی ہے۔

ہالی ووڈ فلم پروڈیوسر اور اداکار زہیر خان  نے کراچی کے ایک فائیو اسٹار ہوٹل میں اپنی دستاویزی فلم کی میڈیا اسکریننگ کی۔  تقریب میں میڈیا شخصیات، فلمی نقاد، فنکاروں، گلوکاروں اور صحافیوں کی بڑی تعداد نے شرکت کی۔

پاکستانی نژاد ہالی ووڈ اداکار زہیر خان رواں سال اپنی دستاویزی فلم ’دی ہالی ووڈ ایکسپریئنس‘ ریلیز کرنے کا اعلان کرتے ہوئے کہا کہ یہ فلم رواں سال ریلیز کی جائے گی اور اسے دنیا بھر کے تمام ڈیجیٹل پلیٹ فارمز پر ریلیز کیا جائے گا۔

انہوں نے کہا کہ دستاویزی فلم کا بنیادی تصور موشن پکچر انڈسٹری کے جوہر اور ہنر کو بیان کرنے کے ساتھ ساتھ کسی کو بھی ہالی ووڈ فلم انڈسٹری کا حصہ بننے کی ترغیب دینا ہے اور اس فلم کو امریکہ کی 6 ریاستوں نیویارک، اٹلانٹا، ٹیکساس، لاس اینجلس، نیو جرسی اور لوزیانا میں فلمایا گیا تھا۔

اداکار زوہیر خان کا کہنا تھا کہ پاکستانی فلم انڈسٹری غیرمعمولی ٹیلنٹ سے بھری ہوئی ہے جو دنیا بھر کی مختلف فلموں کی مارکیٹوں میں بلند سطح پر لانے کے لیے زبردست صلاحیت رکھتی ہے۔

انہوں نے کہا کہ پاکستانی ٹیلنٹ کو ہالی ووڈ فلم انڈسٹری میں اپنی صلاحیتوں کو آزماتے دیکھنا بہترین تجربہ ہوگا ، ہالی ووڈ میں بہت متنوع ٹیلنٹ ہے اور دیگر غیر ملکی ٹیلنٹ کی وجہ سے جو ہم نے اتنا اچھا کام کیا ہے، آج پاکستانی فنکاروں کے پاس اپنی موجودگی کا احساس پیدا کرنے کا بہترین موقع ہے۔