پاکستان شوبز انڈسٹری کے اُبھرتے ہوئے اداکار زاویار اعجاز نے اپنے والد نعمان اعجاز سے متعلق اہم انکشاف کیا ہے۔

حال ہی میں زاویار نے اپنے ایک انٹرویو کے دوران بتایا کہ اس پراجیکٹ کے دوران اپنے والد کے ساتھ وقت گزارنا اور ان سے بہت کچھ سیکھنا اچھا لگا لیکن وہ بہت زیادہ گھبرائے ہوئے تھے۔

میزبان نے سوال کیا کہ پراجیکٹ کی شوٹنگ کے دوارن بطور والد نعمان اعجاز کی جانب سے کوئی خاص روّیہ اپنایا گیا جس کے جواب میں زاویار نے مسکراتے ہوئے کہا کہ اوہ، نہیں جب اُن کے والد سیٹ پر ہوتے ہیں تو وہ اداکار ہیں اور وہ والد کے ساتھی اداکار ہیں۔

انہوں نے کہا کہ اس لئے والد کا روّیہ اُن کے ساتھ بالکل ویسا ہی ہوتا ہے جیسا کہ باقی ساتھی اداکاروں کے ساتھ ہوتا ہے۔

میزبان نے پوچھا کہ کیا نعمان اعجاز کی دہائیوں کی محنت کی وجہ سے زاویار کو کیریئر کے آغاز پر ہی بڑے بجٹ کے پراجیکٹس مل گئے؟

اس سوال کا جواب دیتے ہوئے زاویار نے کہا کہ یہ بات مضحکہ خیز  ہے، اُنہیں بالکل ایسا نہیں لگتا ہے وہ خود بھی ایک شخصیت ہیں، اُن کی ذمہ داری ہے کہ وہ والد کے نقشِ قدم پر چلیں لیکن وہ اس حوالے سے جھوٹ نہیں بولیں گے۔

زاویار نے کہا کہ اُن کے لئے والد کے نقشِ قدم پر چلنا اتنا آسان نہیں ہے۔

واضح رہے کہ زاویار اعجاز نے حال ہی میں شوبز انڈسٹری میں اپنے کیریئر کا آغاز کیا ہے اور ابتداء میں ہی اُنہیں اپنے والد اور نامور اداکار نعمان اعجاز کے ساتھ ایک پراجیکٹ میں کام کرنے کا موقع مل گیا۔