بھارتی اداکار ارجن کپور اور ان کی گرل فرینڈ ملائکہ اروڑا سے متعلق سوشل میڈیا صارفین کی جانب سے چہ مگوئیاں جاری ہے کہ وہ شادی کرنے والے ہیں۔

اداکار ارجن کپور نے اپنے حالیہ انٹرویو میں اپنی گرل فرینڈ ملائکہ اروڑا کی عمر میں 12 سال کے فرق کی وجہ سے ہونے والی تنقید کے بارے میں خاموشی توڑ دی۔

انہوں نے کہا کہ میرے خیال میں عمر کو دیکھنا اور رشتہ کو سیاق و سباق کے مطابق بنانا ایک احمقانہ سوچ کا عمل ہے۔

ارجن کپور نے کہا کہ سب سے پہلے میں سمجھتا ہوں کہ میڈیا ہی وہ ہے جو لوگوں کے تبصروں سے گزرتا ہے اور یہ وہی لوگ ہیں جو جب مجھ سے ملیں گے تو میرے ساتھ سیلفی لینے کے لئے مر رہے ہوں گے ۔

اداکار کا کہنا تھا کہ ہم 90 فیصد منفی تبصروں کو دیکھتے بھی نہیں ہیں، اس لئے ٹرولنگ کو اتنی اہمیت نہیں دی جا سکتی کیونکہ یہ سب جعلی ہے۔

اُنہوں نے کہا کہ میں اپنی ذاتی زندگی میں جو کچھ کرتا ہوں وہ میرا اختیار ہے، اس کے علاوہ آپ اس بارے میں پریشان نہیں ہو سکتے کہ کس کی عُمر کتنی ہے، لہٰذا ہمیں بس جینا چاہئیے ۔

واضح رہے کہ بالی ووڈ اداکارہ و ماڈل ملائکہ اروڑا نے سال 1998ء میں اداکار و فلم ساز ارباز خان سے شادی کی تھی اور دونوں کے ہاں 2002 میں بیٹے ارہان خان کی پیدائش ہوئی تھی، 19 سال شادی رہنے کے بعد ان کی طلاق 2017ء میں ہوئی تھی۔

ارباز خان سے طلاق کے بعد ملائکہ اروڑا نے بالی ووڈ کے نوجوان اداکار ارجن کپور کے ساتھ قریبی تعلقات قائم کیے، سوشل میڈیا پر بھی ان کی جوڑی کے کافی چرچے ہیں ،دونوں اداکاروں کی جانب سے کئی بار کہا گیا ہے کہ وہ بہت جلد شادی کرلیں گے۔