پاکستان شوبز انڈسٹری کی اُبھرتی ہوئی اداکارہ رابعہ کلثوم نے بھی پاکستانی اداکارہ ثناء جاوید کو آڑے ہاتھوں لے لیا۔

اداکارہ رابعہ نے فوٹو اینڈ ویڈیو شیئرنگ ایپ انسٹاگرام پر ثناء جاوید کے لئے ایک اسٹوری شیئر کی۔

انہوں نے اپنی اسٹوری میں میک اپ آرٹسٹ واجد خان کی پوسٹ شیئر کی جس میں اُنہوں نے کہا تھا کہ وہ بھی اس بات سے متفق ہیں کہ ثناء جاوید انڈسٹری کی بدتمیز اداکارہ ہیں۔

رابعہ کلثوم نے اس پوسٹ کو شیئر کرتے ہوئے لکھا کہ اب کانپیں ٹانگنے کا وقت آگیا ہے۔

اداکارہ نے کہا کہ انڈسٹری کے بدتمیز لوگوں کے خلاف آواز اُٹھانے والوں کو دیکھ کر بہت خوشی ہورہی ہے، مجھے ان لوگوں کے درمیان یہ اتحاد پسند ہے۔

واضح رہے کہ اداکارہ ثناء جاوید کے نامناسب رویے سے متعلق سوشل میڈیا پر اس وقت شوبز انڈسٹری کے دیگر فنکاروں کی جانب سے کی جانے والی متعدد پوسٹس وائرل ہیں۔

حال ہی میں پاکستانی فیشن انڈسٹری سے تعلق رکھنے والی ماڈل فریحہ شیخ کی جانب سے ثناء جاوید کے خلاف اپنے انسٹا گرام اکاؤنٹ پر 4 صفحات پر مشتمل ایک طویل نوٹ لکھا گیا تھا جس کے بعد ثناء کے منفی رویے کے خلاف پوسٹس کا انبار لگ گیا ہے۔

فریحہ شیخ کا اپنی پوسٹ میں ثناء جاوید کو غیر سنجیدہ قرار دیتے ہوئے کہنا تھا کہ بہت سارے فنکاوں کی جانب سے ثناء جاوید کے برے اور منفی رویے پر بات کرنے کے بعد وہ بھی اپنے برے تجربے پر بات کرنا چاہتی ہیں، وہ محسوس کر رہی ہیں کہ وہ اکیلی ثناء جاوید کے خراب رویے کا شکار نہیں ہوئیں بلکہ اُن کے جیسے اور بھی بہت سے لوگ ہیں۔

فریحہ شیخ نے بتایا تھا کہ ثناء جاوید اپنے سامنے کسی اور فنکار کو دیکھنا بھی پسند نہیں کرتیں اور اُنہیں خصوصی پروٹوکول کی ضرورت ہوتی ہے اور وہ دوسروں کو حقارت کی نظر سے دیکھتی ہیں۔