ہالی وُڈ اداکار جونی ڈیپ اور اداکارہ ایمبر ہرڈ کے ایک دوسرے پر ہتک عزت کے مقدمے کی سماعت 11 اپریل بروز پیر کو ورجینیا کے شہر فیئر فیکس میں ہوگی۔

اداکار جونی ڈیپ نے 2019 میں اپنی سابق اہلیہ ایمبر ہرڈ کے خلاف مقدمہ درج کراتے ہوئے الزام عائد کیا تھا کہ انہوں نے 2018 میں واشنگٹن پوسٹ میں اداریہ لکھ کر ان کی ساکھ کو نقصان پہنچایا ہے۔

جونی ڈیپ نے مقدمے میں زرِ تلافی کی مد میں 5 کروڑ ڈالرز کی رقم کا مطالبہ کیا۔

2018 میں لکھے گئے اداریے میں اداکارہ ایمبر ہرڈ نے خود کو گھریلو تشدد کی نمائندہ عوامی شخصیت کے طور پر پیش کیا تھا۔

جونی ڈیپ کے مقدمے کے جواب میں ایمبر ہرڈ نے ایک جوابی مقدمہ درج کرایا جس میں اداکار پر یہ الزام عائد کیا گیا کہ انہوں نے اداکارہ کے خلاف مبینہ طور پر توہین آمیز مہم چلائی۔

ایمبر ہرڈ نے اپنے جوابی مقدمے میں جونی ڈیپ کے مقدمے کو تشدد اور ہراسانی کا تسلسل قرار دیا۔

اداکارہ نے نقصان کے ازالے کی مد میں 10 کروڑ ہرجانے کا مطالبہ کیا۔

ٹرائل سے قبل دونوں اداکاروں نے گواہان کی فہرست شائع کی ہے جن کو ان کی ٹیم گواہی کے لیے بلاسکتی ہے۔

کچھ گواہان کے نام یہ ہیں:

ایلون مسک

ٹیسلا سی ای او ایلون مسل ممکنہ ایمبر ہرڈ کے گواہ کے طور پر فہرست میں شامل ہیں، جو ویڈیو لنک کے ذریعے پیش ہوں گے۔

جیمز فرانکو

اداکار جیمز فرانکو بھی ایمبر ہرڈ کے ممکنہ گواہوں کی فہرست میں شامل ہیں، جن کی پیشی ویڈیو لِنک کے ذریعے متوقع ہے۔

پال بیٹینی

اداکار پال بیٹینی جونی ڈیپ کے ممکنہ گواہوں کی فہرست میں شامل ہیں، جن کی پیشی ویڈیو لنک کے ذریعے متوقع ہے۔

جونی ڈیپ

جونی ڈیپ نے اپنے گواہان کی فہرست میں خود کا نام بھی رکھا ہے اور وہ عدالت میں فرداً پیش ہوں گے۔

ایمبر ہرڈ

گواہان کی فہرست میں ایمبر ہرڈ نے اپنا نام بھی رکھا ہے۔