بولی وُڈ انڈسٹری کے پرفیکشنسٹ خان کی بیٹی ایرا خان اپنی سالگرہ منانے پر شدید تنقید کی زد میں ہیں، لیکن ساتھ ہی ان کے والد عامر خان کو بھی مداحوں کے عتاب کا سامنا ہے۔

ایرا نے گزشتہ دنوں اپنی 25 ویں سالگرہ ایک پول ایریا میں منائی۔

سوشل میڈیا پر وائرل ہونے والی تصاویر میں ایرا خان کو بکنی زیبِ تن کیے کیک کاٹتے دیکھا جا سکتا ہے، جبکہ عامر خان بالکل ان کے پیچھے ہی کھڑے ہیں۔

ریٹارڈڈ ہرٹ نامی ٹویٹر ہینڈل نے تصویر پر اعتراض اٹھاتے ہوئے لکھا کہ “کون سی بیٹی اپنے باپ کے سامنے بکنی میں کھڑی ہوتی ہے؟”

ٹویٹر صارف نے مزید لکھا کہ “یہ لوگ نئی نسل پر بہت برا اثر ڈال رہے ہیں، بولی وُڈ ہمارا کلچر تباہ کر رہا ہے اور اس طرح کی نامناسب چیزوں کو جدیدیت کے نام پر عام کر رہا ہے۔”

تنقید کرنے والے صارف کو خرم قریشی نامی ایک شخص نے جواب میں لکھا، “میں آپ کو آسان الفاظ میں یہ بات سمجھا دیتا ہوں۔ عامر خان کو اپنی بیٹی نظر آ رہی ہے، بکنی نہیں۔ اور آپ کو بکنی نظر آ رہی ہے، بیٹی نہیں۔”

ایرا خان کی اس تصویر پر دیگر سوشل میڈیا صارفین نے بھی اپنے رد عمل کا اظہار کیا۔

ایک صارف نے لکھا، “کون سا باپ ہے جو اپنی بیٹی کو ایسے لباس میں دیکھنا چاہتا ہے، مسلمان چھوڑ ہندو معاشرے میں بھی ایسی روایات نہیں ہیں۔”