ملک کی چند بہترین اداکاراؤں میں سے ایک پاکستانی شوبز سے وابستہ حریم فاروق نے نجی ٹی وی کے پروگرام میں اپنے بچپن کا ایک واقعہ سنایا۔

انہوں نے بچپن میں اپنی گمشدگی کا واقعہ سناتے ہوئے بتایا کہ جب وہ آٹھ سال کی تھیں تو انہوں نے ڈرائیور سے ضد کی کہ وہ انہیں پھوپھو کے گھر چھوڑ کر آئے۔

ڈرائیور نے حریم کو کہا کہ ابھی نہیں چھوڑ کر آرہا مجھے کھانا کھانے جانا ہے، جس پر وہ مزید ضد پر آگئیں اور کہا کہ اگر آپ نہیں چھوڑنے جائیں گے تو میں خود چلی جاؤں گی۔

ڈرائیور نے مسکرا کر مذاق میں کہا کہ اچھا چلی جائیں۔

حریم کا کہنا تھا کہ ڈرائیور کے کہنے پر میں باہر نکل گئی، مجھے پھوپھو کے گھر کا راستہ معلوم تھا جو آدھے گھنٹے کا ہوگا۔۔\

انہوں نے بتایا کہ اسلام آباد میں کوئی بچہ اکیلا گھوم رہا ہوتا تھا تو لوگ پوچھتے تھے کہاں جارہے ہو، مجھے بھی ایک انکل ملے۔ انہوں نے پوچھا کہ بیٹا کہاں جارہی ہوں؟ جس پر میں نے کہا کہ پھوپھو کے گھر جارہی ہوں۔

ان انکل نے حریم سے پوچھا کہ بیٹا آپ کتنے سال کی ہو؟ تو انہوں نے جواب دیا کہ آٹھ سال کی ہوں۔

انکل نے مزید پوچھا کہ آپ کونسی کلاس میں ہو، جس پر حریم نے بتایا کہ وہ میٹرک کر رہی ہیں۔

اداکارہ نے بتایا کہ جب وہ پھوپھو کے گھر قریب پہنچیں تو اندھیرا ہونے لگا تھا، ایسے میں دو لڑکے ان کے پاس آئے، اور وہی سوال دہرائے کہ کہاں جارہی ہو؟

حریم نے انہیں بھی بتایا کہ وہ پھوپھو کے گھر جارہی ہیں۔

ان لڑکوں نے حریم سے پوچھا، بیٹا آپ کو پتا ہے کہ پھوپھو کا گھر کہاں ہے اس پر انہوں نے جواب دیا کہ یہیں بس تھوڑا سا دور ہے۔

انجان لڑکوں نے کہا کہ آپ کے گھر میں پتا ہے آپ کہاں ہو؟

حریم نے کہا کہ نہیں گھر میں تو نہیں معلوم۔

جس کے بعد ان لڑکوں نے کہا کہ ہم آپ کو گھر لے جاتے ہیں، امی ابو کو بتا کر آپ کو پھوپھو کے گھر چھوڑ آئیں گے۔

حریم نے بتایا کہ جب وہ گھر لے کر پہنچے تو امی اور ابو تھانے گئے ہوئے تھے، دادا اور دادی پریشان بیٹھے ہوئے تھے۔

حریم کے دادا نے ان لڑکوں کا شکریہ ادا کیا اور انہیں زور دار تھپڑ رسید کیا، دادا نے حریم کو تنبیہہ کی کہ آئندہ بغیر بتائے کہیں نہیں جانا، جس پر حریم نے کہا کہ ٹھیک ہے آئندہ نہیں جاؤں گی۔