نامور بھارتی پنجابی گلوکار اور اپوزیشن جماعت کانگریس کے رہنما سدھو موسے والا کے قاتل کا پتا چل گیا۔

گزشتہ روز قتل ہونے والے بھارتی گلوکار کا قاتل کینیڈا کا گینگسٹر نکلا۔

پولیس کا کہنا ہے کہ کینیڈا میں مقیم ایک گینگسٹر نے حملے کی ذمہ داری قبول کی ہے۔

اُنہوں نے کہا کہ کینیڈا کا لارنس بشنوئی گینگ اس قتل میں ملوث ہے، گینگ کے رکن لکی نے کینیڈا سے ذمہ داری لی ہے۔

پنجاب پولیس نے واقعے کی تحقیقات کے لیے خصوصی تحقیقاتی ٹیم بھی تشکیل دے دی ہے۔

واضح رہےکہ سدھو موسے والا کو گزشتہ روز  ضلع مانسا میں فائرنگ کر کے قتل کردیا گیا۔

گلوکار سدھو موسے والا اُن 424 شخصیات میں شامل تھے جنہیں پولیس کی طرف سے فراہم کردہ سیکیورٹی ختم کردی گئی تھی۔

بھارتی میڈیا رپورٹ کے مطابق سدھو بھارتی پنجاب کے وزیراعلیٰ بھگونت مان سے سیکیورٹی مانگنے کے حوالے سے ہی ملاقات کرنے جارہے تھے۔

نامعلوم مسلح افراد نے ان کی جیپ پر فائرنگ کی جس میں سدھو کے دو دوست بھی زخمی ہوئے۔

پولیس حکام کے مطابق فائرنگ کے اس واقعے میں گلوکار موقع پر ہی ہلاک ہوگئے تھے۔

یاد رہے کہ پنجابی گلوکار کے مداحوں کی تعداد لاکھوں میں ہے انہوں نے رواں سال 20 فروری کو کانگریس کے ٹکٹ پر اسمبلی انتخابات میں حصہ لیا تھا لیکن 63 ہزار ووٹوں سے ہار گئے تھے۔