پاکستان کے معروف اداکار، ڈائریکٹر اور پروڈیوسر تنویر جمال کو ایک بار پھر کینسر کی تشخیص ہوئی ہے۔

اداکار نے پاکستان سمیت دنیا بھر میں اپنے چاہنے والوں سے صحتیابی کے لیے دعاؤں کی اپیل کی ہے۔

تنویر جمال 2016 میں پہلی دفعہ کینسر کے مرض کا شکار ہوئے تھے تاہم علاج کے بعد صحتیاب ہوگئے تھے لیکن چند ماہ قبل انہیں پھر سے تکلیف ہوئی اور ایک بار پھر کینسر کی تشخیص ہوئی جس سے ان کی صحت کافی متاثر ہوئی۔

انہوں نے اب کینسر کے مکمل علاج کے لیے جاپان منتقل ہونے کا فیصلہ کیا ہے۔

توقع ہے کہ اگلے ہفتے جاپان میں کینسر ماہرین ان کا تفصیلی چیک اپ کرکے علاج شروع کریں گے۔

واضح رہے کہ اداکار تنویر جمال گزشتہ 35 برسوں سے اپنی شاندار اداکاری کے ذریعے پاکستان میں اہم مقام رکھتے ہیں۔

انہیں بہترین اداکاری پر بی ٹی وی کی جانب سے بیسٹ ایکٹر ایوارڈ سے بھی نوازا جاچکا ہے جبکہ پرائیوٹ پروڈکشن میں سے پہلے ایکشن سے بھرپور میگا ڈرامہ سیریل گاڈ فادر جو جاپان اور پاکستان میں ریکارڈ کی گئی کو ڈائریکٹ اور پروڈیوس کرکے انڈسٹری میں اپنا نام بنایا

اداکار نے درجنوں معروف ڈرامہ سیریل میں بہترین اداکاری کے جوہر دکھائے جبکہ اب پیمبر نہیں آئیں گے اور عنقریب ریلیز ہونے والی فلم جاپان کنکشن پر ڈائریکٹ اور پروڈیوس کی ہے۔