پاکستان تحریک انصاف کے منحرف ممبر قومی اسمبلی عامر لیاقت کی تیسری اہلیہ دانیہ شاہ نے انکشاف کیا ہے کہ عامر لیاقت انہیں نماز بھی نہیں پڑھنے دیتے تھے۔

میڈیا سے گفتگو کرتے ہوئے دانیہ شاہ کا کہنا تھا کہ شادی کے بعد انہوں  نے عامر لیاقت کے ساتھ بہت اذیت میں وقت گزارا۔

ان کا کہنا تھا کہ انہوں نے اللہ سے رو رو کر دعا مانگی کہ ان سے کوئی غلطی ہوئی ہے تو معاف کردیں کیوں کہ عامر لیاقت انہیں نماز  بھی نہیں پڑھنے دیتے تھے۔

بہاولپور جانے کے متعلق کیے گئے سوال پر دانیہ شاہ کا کہنا تھا کہ عید سے قبل انہوں نے عامر لیاقت کے ہاتھ پیر جوڑے کہ وہ کچھ دنوں میں واپس آجائیں گی،  جب کہیں جا کر انہیں بہاولپور جانے کی اجازت ملی۔

دانیہ کا کہناتھا کہ عامر لیاقت جیسے لوگ اپنی ماں کو عزت نہیں دے سکتے تو دوسری عورتوں کو کیا عزت دیں گے۔ شادی کے دوسرے دن ہی انہوں نے نوکروں کے سامنے مجھے عزت نہیں دی، یہ صرف میڈیا کے سامنے مجھے پیار کرتے تھے۔

واضح رہے حال ہی میں دانیہ شاہ نے ایک انسٹا اسٹوری شیئر کی تھی جس میں انہوں نے آگاہ کیا تھا کہ انہوں نے شوہر سے خلع کے لیے عدالت سے رجوع کر لیا ہے۔

بعد ازاں دانیہ شاہ نے عامر لیاقت پر سنگین الزامات لگاتے ہوئے کہا کہ وہ نشہ آور ہو کر انہیں تشدد کا نشانہ بناتے ہیں۔

گزشتہ دنوں فیس بک پر ایک ویڈیو تیزی سے وائرل ہوئی جس میں دانیہ شاہ کو کال پر بات کرتے ہوئے سُنا جاسکتا ہے۔

آڈیو کال میں دانیہ شاہ کا کہنا تھا کہ اگر کوئی شیطان سے بھی اوپر ہوتا تو اسے عامر لیاقت کہتی، انہوں نے مجھے نشے کروانے کی بہت کوشش کی۔