مشہور بھارتی ٹیلی ویژن سیریل تارک مہتا کا الٹا چشمہ کے ناظرین نے نیا مواد لانے کا مطالبہ کردیا۔

حالیہ انٹرویو میں سیریل کے جیٹھا لال عرف دلیپ جوشی نے اعتراف کیا ہے کہ ناظرین ایک ہی طرح کا مواد دیکھتے دیکھتے تھک گئے ہیں اور لوگ نیا مواد نہ ہونے کی وجہ سے تنقید کا نشانہ بنارہے ہیں۔

انٹرویو کے دوران دلیپ جوشی نے کہا کہ میں ایک اداکار ہوں اور خود کو دی گئی اسکرپٹ سے متعلق انصاف کرنے کی کوشش کرتا ہوں۔

انہوں نے کہا کہ اس شو کے پروڈیوسرز اور فنکار اپنے مداحوں کو محظوظ کرنے کے لیے سخت محنت کر رہے ہیں۔

اداکار نے بتایا کہ میں اور نہ ہی کوئی اور شخص سیریل کی کامیابی کا سہرا خود لیتا ہے، ہم روزانہ سیٹ پر جاتے ہیں اور اپنے پرستاروں کو محظوظ کرنے کے لیے سخت محنت کرتے ہیں۔

یاد رہے کہ 2008 میں شروع ہونے والے اس شو کے پاس لمبے عرصے تک ٹیلی ویژن پر چلنے والے ڈیلی سٹکام کا گینیز ریکارڈ ہے۔

سوشل میڈیا پر تارک مہتا کا نام لے کر مداح مطالبہ کر رہے ہیں کہ اب اس شو میں کچھ نیا ہونا چاہئیے۔

ایک صارف نے لکھا کہ اب آپ کو ریٹائر ہوجانا چاہئیے، جبکہ ایک اور نے سوال کیا کہ آپ کے پاس نیا مواد ہے؟

دوسرے صارف نے شو کے پروڈیوسر کو ٹیگ کرتے ہوئے لکھا کہ آپ کا خیال نہیں کہ اب آپ کو بریک لے کر سیزن ٹو لانا چاہئیے۔