پاکستان کی ماضی کی نامور اداکارہ ریما خان کراچی انڈس اسپتال میں کینسر کے مریض بچوں سے ملاقات کرنے پہنچ گئیں۔

اداکارہ اپنے شوہر اور بین الاقوامی شہرت یافتہ ماہر امراض قلب ڈاکٹر طارق شہاب کے ساتھ پاکستان کے دورے پر ہیں، اداکارہ اپنے شوہر کے ساتھ انڈس اسپتال پہنچیں جہاں انہوں نے کراچی میں پیڈیاٹرک اونکولوجی وارڈ کا دورہ کیا۔

چیئر پیڈیاٹرک سروسز انڈس اسپتال ڈاکٹر محمد فرید الدین نے ریما خان کو اسپتال میں امراض اطفال کے مختلف شعبہ جات کے بارے میں بریفنگ دی۔

انہوں نے اسپتال کے بیسڈ اسکول ’انڈس کے ساتھ‘ کا بھی دورہ کیا اور پیڈیاٹرک اونکولوجی میں زیر علاج بچوں سے طویل ملاقات کی جہاں ان کے اسکول کی تعلیم جاری رکھنے کا موقع فراہم کیا جاتا ہے۔

ریما خان ڈے کئیر یونٹ بھی گئیں جہاں کیموتھراپی کے لئے موجود مریض بچوں کی خوب دلجوئی کی اور بچوں کے ساتھ اچھا وقت گزارا۔

اداکارہ نے علاج کے لیے خیبرپختونخوا سے آئے بچے سے پشتو اور افغانستان سے آئے ہوئے مریض بچے کے ساتھ فارسی میں گفتگو کی۔

ریما خان نے مریض بچوں کے ساتھ تصویریں بنائیں، اداکارہ سے مل کر مریض بچے اور ان کے والدین بہت خوش ہوئے۔

انہوں نے موذی امراض میں مبتلا بچوں کو دیکھ کر پہلے افسوس اور پھر خوشی کا اظہار کرتے ہوئے کہا کہ دکھ اس بات کا ہے کہ معصوم بچے کس کس طرح کے امراض میں مبتلا ہیں اور خوشی اس بات کی ہے کہ ان کے علاج اور دلجوئی کے لیے انڈس اسپتال کی انتظامیہ ہرممکن اقدام اٹھا رہی ہے۔

واضح رہے کہ کراچی میں انڈس اسپتال اور صحت کے نیٹ ورک کی پیڈیاٹرک اونکولوجی یونٹ خطے میں اور پاکستان میں سب سے بڑا ہے جس میں 85 بستر کی سہولت ہیں۔

جہاں کراچی اور پاکستان کے مختلف دور دراز علاقوں سے ہی نہیں بلکہ افغانستان اور ایران سے بھی مریضوں مفت صحت یابی کے لئے یہاں آتے ہیں۔

انڈس اسپتال ڈاکٹر عبدالباری خان نے کورنگی کراچی میں 2007 میں قائم کیا تھا اور اب ملک کے 52 اضلاع اور پاکستان کے 13 بڑے اسپتالوں کا ایک نیٹ ورک بن گیا ہے۔